તેહરાન:  પશ્ચિમ એશિયાના રણમેદાનમાં હવે મિસાઈલ હુમલાઓનો સમય પૂરો થઈ રહ્યો હોય અને સીધો સામસામેનો જંગ શરૂ થવાનો હોય તેવા એંધાણ મળી રહ્યા છે. રાષ્ટ્રપતિ ડોનાલ્ડ ટ્રમ્પના આદેશ પર ચાલી રહેલા 'ઓપરેશન એપિક ફ્યુરી'ના ત્રીજા સપ્તાહમાં પેન્ટાગોને ઈરાનની અંદર પાયદળ સૈનિકો (Boots on the Ground) ઉતારવાની પુષ્ટિ કરી છે. સંરક્ષણ સચિવ પીટ હેગસેથના સત્તાવાર નિવેદન મુજબ, અમેરિકાએ અત્યાર સુધીમાં ઈરાનના 7,000 થી વધુ સૈન્ય ઠેકાણાઓને રાખમાં ફેરવી દીધા છે. જોકે, સૌથી ભયાનક વળાંક ત્યારે આવ્યો જ્યારે અમેરિકાએ ઈરાનની આર્થિક કરોડરજ્જુ સમાન 'ખાર્ગ ટાપુ' પર કબજો કરવાની યોજના જાહેર કરી. આ ટાપુ ઈરાનની 90 ટકા તેલ નિકાસનું કેન્દ્ર છે, અને જો અમેરિકી મરીન કોર્પ્સ ત્યાં ઉતરે છે, તો ઈરાન ઘૂંટણિયે આવી શકે છે, પરંતુ આ મિશનમાં હજારો અમેરિકી સૈનિકોના જીવનું જોખમ પણ એટલું જ છે.

લશ્કરી વિશ્લેષકો ચેતવણી આપી રહ્યા છે કે ઈરાનની હવાઈ સંરક્ષણ પ્રણાલી ભલે 'સપાટ' થઈ ગઈ હોય, પરંતુ ઈરાનનું અસલી જોખમ તેની જમીની લડાઈમાં છુપાયેલું છે. ઈરાની સૈન્ય અને રિવોલ્યુશનરી ગાર્ડ્સ (IRGC) એ દાયકાઓથી પહાડી વિસ્તારોમાં ગેરિલા યુદ્ધની તૈયારી કરી છે. ઈરાનના ભૂગર્ભ 'મિસાઈલ સિટીઝ' અને હજારોની સંખ્યામાં રહેલા 'કામિકાઝ' (આત્મઘાતી) ડ્રોન હજુ પણ અકબંધ હોવાની આશંકા છે. જો ટ્રમ્પની સેના ઈરાનના દરિયાકાંઠાના વિસ્તારોમાં પગ મૂકે છે, તો તેમને પહાડોમાં છુપાયેલા સ્નાઈપર્સ અને જમીની સુરંગોનો સામનો કરવો પડશે. નિષ્ણાતો માને છે કે જો આ આક્રમણ લાંબુ ખેંચાય તો ટ્રમ્પ માટે આ યુદ્ધ 'મૃત્યુનો જાળ' બની શકે છે, જ્યાં આધુનિક હથિયારો પણ ઈરાની ભૂમિના જટિલ ભૂપ્રદેશ સામે લાચાર બની જશે.

બીજી તરફ, આ આક્રમણની પુષ્ટિ થતા જ વૈશ્વિક બજારોમાં તેલના ભાવમાં ભડકો થયો છે અને ત્રીજા વિશ્વયુદ્ધનો ભય ઘેરો બન્યો છે. ઈરાને પણ વળતો પ્રહાર કરવાની ધમકી આપતા જણાવ્યું છે કે જો અમેરિકી સૈનિકો તેમની ધરતી પર પગ મૂકશે, તો પર્શિયન ગલ્ફ અમેરિકી જહાજો માટે 'લોખંડની કબર' બની જશે. પેન્ટાગોનના આંતરિક સૂત્રો મુજબ, સ્પેશિયલ ફોર્સિસ પહેલેથી જ સ્ટેન્ડ-બાય મોડ પર છે અને ગમે તે ક્ષણે હેલિકોપ્ટર્સ દ્વારા ખાર્ગ ટાપુ પર ઉતરાણ શરૂ થઈ શકે છે. હવે જોવાનું એ રહેશે કે શું ટ્રમ્પનું 'જબરદસ્ત બળ' ઈરાનને શરણે આવવા મજબૂર કરશે, કે પછી અમેરિકા ફરી એકવાર પશ્ચિમ એશિયાના ક્યારેય ન પૂરા થનારા લોહિયાળ યુદ્ધમાં ફસાઈ જશે.