સિંગાપોર | તા.20: જો તમે આગામી દિવસોમાં સિંગાપોરના પ્રવાસનું આયોજન કરી રહ્યા હોવ, તો બજેટમાં થોડો વધારો કરવા તૈયાર રહેજો. વૈશ્વિક સ્તરે ઇંધણના ભાવમાં થયેલા તોતિંગ વધારાને પગલે સિંગાપોરના સૌથી મોટા ટેક્સી ઓપરેટર, કમ્ફર્ટડેલગ્રો (ComfortDelGro) એ 24 માર્ચથી ભાડામાં વધારો કરવાની જાહેરાત કરી છે. આ ફેરફારથી માત્ર સ્થાનિક લોકો જ નહીં, પરંતુ પ્રવાસીઓ માટે પણ પરિવહન મોંઘું બનશે.
ભાડામાં કેટલો વધારો થશે?
બ્લૂમબર્ગના અહેવાલ મુજબ, મુસાફરોએ હવે દરેક ટ્રીપ દીઠ S$0.50 થી S$0.80 (સિંગાપોર ડોલર) જેટલો વધારાનો ચાર્જ ચૂકવવો પડશે. એટલું જ નહીં, મીટરવાળી રાઈડમાં અંતર અને સમયના દરમાં પણ S$0.01 નો વધારો કરવામાં આવ્યો છે. કંપની પાસે 8,400 થી વધુ ટેક્સીઓનો કાફલો છે અને આ વધારાની રકમ સીધી ડ્રાઈવરોને આપવામાં આવશે જેથી તેઓ મોંઘા ઇંધણનો ખર્ચ વેઠી શકે. આ નવા દરો હાલ પૂરતા 31 મે સુધી લાગુ રહેશે.
કેમ વધી રહ્યા છે ભાવ?
ઇરાન અને પડોશી દેશો વચ્ચેના ભૌગોલિક તણાવને કારણે વૈશ્વિક બજારમાં ક્રૂડ ઓઈલની કિંમત 100 ડોલર પ્રતિ બેરલ ને વટાવી ગઈ છે. પેટ્રોલ, ડીઝલ અને નેચરલ ગેસના ભાવ વધતા ટ્રાન્સપોર્ટ સેક્ટર પર માઠી અસર પડી છે. સિંગાપોર જ નહીં, પરંતુ એશિયાના અન્ય દેશો જેમ કે થાઈલેન્ડ અને ફિલિપાઈન્સ પણ ઇંધણની કટોકટીનો સામનો કરી રહ્યા છે.
પ્રવાસીઓ પર અસર
સિંગાપોર આવતા પ્રવાસીઓ સામાન્ય રીતે એરપોર્ટ ટ્રાન્સફર અને નાઇટલાઇફ માણવા માટે ટેક્સીઓનો વધુ ઉપયોગ કરે છે. મરીના બે સેન્ડ્સ, ઓર્કાર્ડ રોડ કે સેન્ટોસા આઇલેન્ડ જવા માટે હવે ટેક્સી મોંઘી પડશે. જોકે, સિંગાપોર તેની ઝગમગતી રાતો અને ફૂડ સ્ટ્રીટ્સ માટે જાણીતું છે, પણ હવે ત્યાં ફરવા માટે પ્રવાસીઓએ ટ્રાન્સપોર્ટેશન બજેટ પર થોડી વધુ કસરત કરવી પડશે.