કોલકાતા:  પશ્ચિમ બંગાળ વિધાનસભા ચૂંટણી ૨૦૨૬ માટે મમતા બેનર્જીએ તૃણમૂલ કોંગ્રેસ (TMC)નું આક્રમક જાહેરનામું બહાર પાડ્યું છે. 'દીદીના ૧૦ સંકલ્પો' હેઠળ મહિલાઓ માટેની 'લક્ષ્મી ભંડાર' યોજનાની રકમમાં વધારો કરવાની જાહેરાત કરવામાં આવી છે, જેમાં સામાન્ય શ્રેણીની મહિલાઓને હવે વાર્ષિક ₹૧૮,૦૦૦ અને SC/ST મહિલાઓને ₹૨૦,૪૦૦ મળશે. સૌથી મહત્વની જાહેરાત યુવાનો માટે છે, જેમાં 'બાંગ્લાર યુવા સાથી' યોજના હેઠળ નોકરી ન મળે ત્યાં સુધી દર મહિને ₹૧,૫૦૦નું બેરોજગારી ભથ્થું આપવાનું વચન અપાયું છે.

જાહેરનામામાં કૃષિ ક્ષેત્ર માટે ₹૩૦,૦૦૦ કરોડના વિશેષ બજેટની ફાળવણી સાથે ભૂમિહીન ખેડૂતોને આર્થિક સહાય અને દરેક પરિવારને પાકા ઘરની ગેરંટી આપવામાં આવી છે. સ્વાસ્થ્ય ક્ષેત્રે 'દ્વારે ચિકિત્સા' અભિયાન દ્વારા વૃદ્ધો અને જરૂરિયાતમંદોને ઘરઆંગણે મફત સારવાર ઉપલબ્ધ કરાવવાનો સંકલ્પ લેવાયો છે. મમતા બેનર્જીએ બંગાળને પૂર્વી ભારતનું વેપાર હબ બનાવવાની સાથે શિક્ષણ વ્યવસ્થાના સંપૂર્ણ કાયાકલ્પ પર ભાર મૂક્યો છે.

રાજકીય પ્રહારો કરતા મમતા બેનર્જીએ કેન્દ્રની ભાજપ સરકાર પર બંગાળના વિભાજન અને લોકશાહીની હત્યાના ગંભીર આરોપો લગાવ્યા છે. તેમણે વડાપ્રધાન અને ગૃહમંત્રી પર નિશાન સાધતા કહ્યું કે ભાજપ એજન્સીઓ દ્વારા બંગાળને ડરાવવાનો પ્રયાસ કરી રહ્યું છે, પરંતુ જનતા તેમને જડબાતોડ જવાબ આપશે. ચૂંટણી પહેલા જાહેર કરાયેલા આ કલ્યાણકારી વાયદાઓએ બંગાળના રાજકારણમાં ભારે ગરમાવો લાવી દીધો છે.