લોસ એન્જલસ:હોલીવુડના સુપ્રસિદ્ધ એક્શન સ્ટાર અને માર્શલ આર્ટ્સના દિગ્ગજ ખેલાડી ચક નોરિસનું ૮૬ વર્ષની વયે અવસાન થયું છે. શુક્રવારે તેમના પરિવારે એક સત્તાવાર નિવેદન જારી કરીને આ દુઃખદ સમાચારની પુષ્ટિ કરી હતી. પ્રાપ્ત વિગતો અનુસાર, છેલ્લા ૨૪ કલાક દરમિયાન હવાઈના કાઉઈ ટાપુ પર તેમને અચાનક મેડિકલ ઈમરજન્સી ઊભી થતા હોસ્પિટલમાં દાખલ કરવામાં આવ્યા હતા, જ્યાં તેમણે અંતિમ શ્વાસ લીધા હતા. પરિવારે જણાવ્યું હતું કે અંતિમ સમયે તેઓ તેમના પરિવારના સભ્યોથી ઘેરાયેલા હતા અને અત્યંત શાંતિપૂર્ણ રીતે વિદાય લીધી હતી.

પરિવારની ભાવભીની શ્રદ્ધાંજલિ:
ચક નોરિસના પરિવારે તેમને શ્રદ્ધાંજલિ આપતા જણાવ્યું હતું કે, "વિશ્વ માટે તેઓ એક માર્શલ આર્ટિસ્ટ, અભિનેતા અને શક્તિનું પ્રતિક હતા, પરંતુ અમારા માટે તેઓ એક સમર્પિત પતિ, પ્રેમાળ પિતા, દાદા અને અદભૂત ભાઈ હતા. તેઓ અમારા પરિવારનું હૃદય હતા." તેમણે વધુમાં ઉમેર્યું હતું કે નોરિસનું જીવન શ્રદ્ધા, હેતુ અને પોતાના પ્રિયજનો પ્રત્યેની અતૂટ પ્રતિબદ્ધતાથી ભરેલું હતું. તેમની શિસ્ત અને દયાળુ સ્વભાવે વિશ્વના લાખો લોકોને પ્રેરણા આપી છે.

બ્રુસ લી સાથેની ટક્કર અને ફિલ્મી સફર:
ઓકલાહોમાના રાયનમાં જન્મેલા નોરિસ ૧૯૫૮માં એરફોર્સમાં એર પોલીસમેન તરીકે જોડાયા હતા. દક્ષિણ કોરિયામાં ફરજ દરમિયાન તેમને 'ચક' નામ મળ્યું અને ત્યાંથી જ તેમણે 'ટાંગ સૂ ડો' (Tang Soo Do) માર્શલ આર્ટ્સની તાલીમ શરૂ કરી હતી. ૧૯૬૨માં એરફોર્સમાંથી નિવૃત્ત થયા બાદ તેમણે કરાટે સ્કૂલ શરૂ કરી હતી, જ્યાં સ્ટીવ મેક્વીન જેવા સેલિબ્રિટીઓ તેમના શિષ્ય હતા.

તેમની ફિલ્મી કારકિર્દીની સૌથી યાદગાર ક્ષણ ૧૯૭૨માં આવી જ્યારે તેમણે લેજન્ડરી બ્રુસ લી સાથે ફિલ્મ 'ધ વે ઓફ ધ ડ્રેગન'માં કામ કર્યું. ત્યારબાદ તેમણે 'ધ ડેલ્ટા ફોર્સ', 'મિસિંગ ઇન એક્શન', 'ધ ઓક્ટાગોન' અને 'કોડ ઓફ સાયલન્સ' જેવી અનેક સુપરહિટ એક્શન ફિલ્મો આપી. સાત વર્ષના વિરામ બાદ ૨૦૧૨માં તેઓ સિલ્વેસ્ટર સ્ટેલોનની ફિલ્મ 'ધ એક્સપેન્ડેબલ્સ ૨'માં પણ જોવા મળ્યા હતા.

ટીવી જગતમાં ‘વોકર’ તરીકે લોકપ્રિયતા:
ફિલ્મો બાદ ચક નોરિસે ટેલિવિઝન ક્ષેત્રે પણ જબરદસ્ત સફળતા મેળવી હતી. સીબીએસની હિટ સીરીઝ 'વોકર, ટેક્સાસ રેન્જર' (૧૯૯૩-૨૦૦૧) દ્વારા તેઓ ઘરે-ઘરે લોકપ્રિય બન્યા હતા. તેમણે પોતાની કારકિર્દીની છેલ્લી ફિલ્મ ૨૦૦૫માં 'ધ કટર' કરી હતી. અભિનય ઉપરાંત તેઓ એક લેખક પણ હતા અને તેમણે ખ્રિસ્તી તેમજ દેશભક્તિના વિષયો પર અનેક પુસ્તકો લખ્યા હતા.

વ્યક્તિગત જીવન:
ચક નોરિસે બે લગ્ન કર્યા હતા. તેમના પ્રથમ લગ્ન ૧૯૫૮માં ડાયના હોલેચેક સાથે થયા હતા, જેમનાથી ૧૯૮૮માં છૂટાછેડા થયા હતા. ત્યારબાદ ૧૯૯૮માં તેમણે ગેના ઓ’કેલી સાથે લગ્ન કર્યા હતા. તેઓ પોતાના પરિવારમાં પત્ની ગેના, પુત્રો એરિક અને માઈક, પુત્રીઓ ડાકોટા ડેનીલી અને દીના તેમજ પૌત્ર-પૌત્રીઓને વિલાપ કરતા છોડી ગયા છે. હોલીવુડના આ મહાન એક્શન હીરોની વિદાયથી એક યુગનો અંત આવ્યો છે.