મુંબઈ ભારતની દરિયાઈ સરહદો હવે પહેલા કરતા વધુ સુરક્ષિત અને અભેદ્ય બનવા જઈ રહી છે. આગામી ૩ એપ્રિલના રોજ ભારતીય નૌકાદળના ભાથામાં એક નવું અને અત્યંત શક્તિશાળી શસ્ત્ર 'INS તારાગિરી' ઉમેરાવા જઈ રહ્યું છે. મુંબઈના માઝાગોન ડોક શિપબિલ્ડર્સ લિમિટેડ દ્વારા નિર્મિત આ સ્ટીલ્થ ફ્રિગેટ પ્રોજેક્ટ 17A હેઠળનું ચોથું શક્તિશાળી જહાજ છે. આ યુદ્ધ જહાજ એટલું આધુનિક છે કે તે દુશ્મનના રડારમાં પકડાયા વગર સમુદ્રના મોજાંઓ પર રફ્તાર ભરી શકે છે.
બ્રહ્મોસ અને અત્યાધુનિક શસ્ત્રોનો મારો
INS તારાગિરી માત્ર એક જહાજ નથી, પણ સમુદ્રમાં તરતો એક કિલ્લો છે. તે વિશ્વની સૌથી ઝડપી સુપરસોનિક ક્રુઝ મિસાઈલ 'બ્રહ્મોસ' થી સજ્જ છે, જે સપાટીથી સપાટી પર ચોક્કસ નિશાન સાધવામાં સક્ષમ છે. આ ઉપરાંત, હવાઈ હુમલાઓ સામે રક્ષણ મેળવવા માટે તેમાં મધ્યમ અંતરની MRSAM મિસાઈલ સિસ્ટમ પણ લગાવવામાં આવી છે. પાણીની અંદર છુપાયેલી દુશ્મન સબમરીનનો ખાતમો બોલાવવા માટે આ જહાજ એન્ટી-સબમરીન રોકેટ અને ટોર્પિડોથી પણ સજ્જ છે.
આત્મનિર્ભર ભારતનું ઉત્કૃષ્ટ ઉદાહરણ
આ યુદ્ધ જહાજની સૌથી મોટી વિશેષતા એ છે કે તેમાં ૭૫ ટકાથી વધુ સ્વદેશી સામગ્રીનો ઉપયોગ કરવામાં આવ્યો છે. ૨૦૦ થી વધુ ભારતીય MSME એકમોએ તેના નિર્માણમાં પોતાનું યોગદાન આપ્યું છે. ૮૧ મહિનાના ટૂંકા ગાળામાં તૈયાર થયેલું આ જહાજ ભારતની શિપબિલ્ડિંગ ક્ષમતાનો પુરાવો આપે છે. તે હાઈ-સ્પીડ ઓપરેશન માટે ગેસ અને ડીઝલ પ્રોપલ્શન સિસ્ટમથી સજ્જ છે, જે તેને લાંબા અંતર સુધી ઝડપથી પહોંચવામાં મદદ કરે છે.
વ્યૂહાત્મક મહત્વ અને દરિયાઈ વર્ચસ્વ
હાલમાં હોર્મુઝની સામુદ્રધુની અને મિડલ ઈસ્ટમાં વધી રહેલા તણાવ વચ્ચે INS તારાગિરીનું નૌકાદળમાં સામેલ થવું ભારત માટે ખૂબ જ મહત્વનું છે. આ જહાજ માત્ર યુદ્ધ જ નહીં, પરંતુ આપત્તિના સમયે માનવતાવાદી સહાય અને રાહત કામગીરી માટે પણ વાપરી શકાય તેવું મલ્ટી-મિશન પ્લેટફોર્મ છે. આ આધુનિક 'શિકારી' ના આગમનથી હિંદ મહાસાગરમાં ભારતનું વર્ચસ્વ વધુ મજબૂત બનશે અને ચીન તથા પાકિસ્તાન જેવા પડોશી દેશો માટે ભારતની દરિયાઈ શક્તિ પડકારરૂપ સાબિત થશે.