અયોધ્યા: ઇન્ડિયન પ્રીમિયર લીગ (IPL) 2026 ની રોમાંચક શરૂઆત પહેલા ક્રિકેટના મેદાનમાં ભક્તિનો માહોલ જોવા મળી રહ્યો છે. લખનઉ સુપર જાયન્ટ્સ (LSG) ની આખી ટીમ હાલમાં ઉત્તર પ્રદેશના લખનઉમાં આવેલા એકાના સ્ટેડિયમમાં સઘન પ્રેક્ટિસ કરી રહી છે, પરંતુ પ્રી-સીઝન ટ્રેનિંગના વ્યસ્ત શિડ્યુઅલ વચ્ચે પણ ખેલાડીઓએ આધ્યાત્મિક શાંતિ અને વિજયના આશીર્વાદ મેળવવા માટે અયોધ્યાની મુલાકાત લીધી હતી. કેપ્ટન રિષભ પંતની આગેવાનીમાં ટીમના માલિક સંજીવ ગોયનકા, હેડ કોચ જસ્ટિન લેન્ગર અને બોલિંગ કોચ ભરત અરુણ સહિતના વરિષ્ઠ અધિકારીઓએ ભવ્ય રામ મંદિરમાં શીશ નમાવ્યું હતું. રામ લલ્લાના દર્શન કરીને ટીમ ઈન્ડિયાના સ્ટાર પ્લેયર્સે આગામી ટ્રોફી માટે પ્રાર્થના કરી હતી, જેની તસવીરો સોશિયલ મીડિયા પર અત્યારે જોરદાર વાયરલ થઈ રહી છે.

લખનઉની ટીમ માટે આ સીઝન અત્યંત મહત્વની છે, કારણ કે ટીમ આ વખતે પોતાના પ્રદર્શનમાં સ્થિરતા લાવવા માટે મથામણ કરી રહી છે. અયોધ્યામાં પૂજા-અર્ચના દરમિયાન રિષભ પંત અને યુવા ખેલાડીઓ ભક્તિમાં લીન જોવા મળ્યા હતા. જસ્ટિન લેન્ગર જેવા વિદેશી કોચ માટે પણ ભારતની આ સાંસ્કૃતિક વિરાસતનો અનુભવ અદભૂત રહ્યો હતો. ટીમ મેનેજમેન્ટનું માનવું છે કે આવી મુલાકાતોથી ખેલાડીઓ વચ્ચે એકતા અને માનસિક મજબૂતી વધે છે, જે મેદાન પરના દબાણને હેન્ડલ કરવામાં મદદરૂપ સાબિત થાય છે. આશીર્વાદ લીધા બાદ હવે ટીમ ફરી એકવાર મેદાન પર પરસેવો પાડવા માટે લખનઉ પરત ફરી છે.

બીજી તરફ, લખનઉ સુપર જાયન્ટ્સ માટે સૌથી મોટા સારા સમાચાર એ છે કે તેમનો સૌથી ઝડપી બોલર મયંક યાદવ હવે સંપૂર્ણપણે ફિટ થઈ ગયો છે. ૧૫૬.૭ કિલોમીટર પ્રતિ કલાકની પ્રચંડ ગતિએ બોલ ફેંકીને વિશ્વ ક્રિકેટમાં સનસનાટી મચાવનાર ૨૩ વર્ષીય મયંક યાદવ આ વખતે મેદાનમાં પાયમાલી સર્જવા તૈયાર છે. ઈજાના કારણે છેલ્લી સીઝનમાં માત્ર બે જ મેચ રમી શકનાર મયંક અત્યારે નેટ્સમાં સતત ૧૫૦ પ્લસની ઝડપે બોલિંગ કરી રહ્યો છે. મયંકે એક ઇન્ટરવ્યુમાં જણાવ્યું હતું કે રફતાર તેના માટે કુદરતી ભેટ છે અને હવે તેનું લક્ષ્ય લાઈન-લેન્થ પર વધુ નિયંત્રણ મેળવીને પોતાનો જ જૂનો રેકોર્ડ તોડવાનું છે.

મયંક યાદવની સફર અત્યાર સુધી ઉતાર-ચઢાવવાળી રહી છે, પરંતુ તેની પ્રતિભા પર કોઈને શંકા નથી. ૨૦૨૨ થી ટીમ સાથે જોડાયેલા હોવા છતાં ઈજાના કારણે તેને પૂરતી તકો મળી નહોતી, પરંતુ ૨૦૨૪ માં ડેબ્યુ કર્યા બાદ તેણે ટૂંકા ગાળામાં જ દિગ્ગજ બેટ્સમેનોને હંફાવ્યા હતા. લખનઉની ફાસ્ટ બોલિંગ લાઈન-અપમાં મયંકનું પુનરાગમન રિષભ પંત માટે ટ્રમ્પ કાર્ડ સાબિત થઈ શકે તેમ છે. આ આખી ટીમ અત્યારે રામ લલ્લાના આશીર્વાદ અને યુવા ખેલાડીઓના જોશ સાથે આઈપીએલ ૨૦૨૬ માં છવાઈ જવા માટે આતુર છે.