ઇસ્લામાબાદ: પાકિસ્તાન અને પાકિસ્તાન અધિકૃત જમ્મુ-કાશ્મીર (PoJK) માં સક્રિય આતંકવાદી સંગઠનોએ હવે માનવતાની તમામ હદો વટાવી દીધી છે. જૈશ-એ-મોહમ્મદ અને લશ્કર-એ-તૈયબા જેવા સંગઠનોએ હવે આતંકની નવી સેના તૈયાર કરવા માટે ૭ થી ૧૩ વર્ષના માસૂમ બાળકોને નિશાન બનાવવાનું શરૂ કર્યું છે. આ આતંકી જૂથોએ હવે માત્ર તાલીમ શિબિરો પૂરતું મર્યાદિત ન રહેતા, શાળાઓ અને શૈક્ષણિક સંસ્થાઓમાં ઘૂસણખોરી કરીને બાળકોના મગજમાં ઝેર ઘોળવાનું અભિયાન તેજ કર્યું છે. આ 'બાલ જેહાદી' મિશન હેઠળ બાળકોને નાનપણથી જ કલમ છોડીને કલાશનિકોવ પકડવાની ટ્રેનિંગ આપવામાં આવી રહી છે, જે સમગ્ર વિશ્વની સુરક્ષા માટે અત્યંત ગંભીર ખતરાની ઘંટડી સમાન છે.

આ આતંકવાદી સંગઠનો મુખ્યત્વે આર્થિક રીતે નબળા અને ગરીબ પરિવારોની મજબૂરીનો ફાયદો ઉઠાવી રહ્યા છે. પાકિસ્તાનના મુખ્ય શહેરો અને PoJK ના વિસ્તારોમાં મોટા પોસ્ટરો અને જાહેરાતો લગાવીને વાલીઓને લલચાવવામાં આવી રહ્યા છે. બાળકોને આ આતંકી શાળાઓમાં મોકલવા બદલ મફત શિક્ષણ, રહેઠાણ અને આર્થિક સહાય જેવી લાલચો આપવામાં આવે છે. સૂત્રોના જણાવ્યા અનુસાર, એકવાર બાળક આ શાળાઓની ચાર દીવાલોમાં કેદ થઈ જાય પછી તેના માતા-પિતાને પણ તેને મળવાની પરવાનગી હોતી નથી. આ શાળાઓ ખરેખર તો શિક્ષણના મંદિર નહીં, પરંતુ આતંકવાદીઓ તૈયાર કરવાના કારખાના બની ગઈ છે જ્યાં બાળકોનું બાળપણ છીનવી તેમને આત્મઘાતી હુમલાખોર બનાવવામાં આવે છે.

આતંકવાદી સંગઠનોના કાર્યકરો હવે સરકારી અને ખાનગી શાળાઓમાં જઈને ભડકાઉ ભાષણો આપી રહ્યા છે. શાળાઓમાં એવી સ્પર્ધાઓ અને નાટકોનું આયોજન કરવામાં આવે છે જેમાં નાના બાળકો આતંકવાદીઓના પોશાક પહેરે છે અને માર્યા ગયેલા આતંકવાદીઓના મહિમા કરતા કૃત્યો ભજવે છે. હથિયારો ચલાવવાની તાલીમ હવે આ શાળાઓમાં ફરજિયાત બનાવવામાં આવી છે. જૈશ-એ-મોહમ્મદ આ કાવતરામાં સૌથી વધુ સક્રિય છે અને તેણે બહાવલપુર, લાહોર તથા કરાચી જેવા શહેરોમાં પોતાનું નેટવર્ક ફેલાવી દીધું છે. અનેક વાલીઓ અંધશ્રદ્ધા અને લાલચમાં આવીને પોતાના બાળકોને સામાન્ય શાળાઓમાંથી ઉઠાડીને આ આતંકની પાઠશાળાઓમાં ધકેલી રહ્યા છે.

PoJK ના સ્થાનિક રહેવાસીઓમાં છેલ્લા કેટલાક સમયથી આતંકવાદ પ્રત્યેનો ભ્રમ દૂર થઈ રહ્યો છે અને તેઓ આતંકી તાલીમ શિબિરો બંધ કરવાની માંગ કરી રહ્યા છે. સ્થાનિક યુવાનોમાં જ્યારે હિંસા પ્રત્યે ક્રેઝ ઘટવા લાગ્યો, ત્યારે પાકિસ્તાની સેના અને આતંકી સંગઠનોએ આ નવી અને ભયાનક રણનીતિ અપનાવી છે. નાના બાળકોના કુમળા મગજને સહેલાઈથી બ્રેઈનવોશ કરી શકાય છે, તેથી તેમને 'કિલિંગ મશીન' તરીકે તૈયાર કરવામાં આવી રહ્યા છે. આંતરરાષ્ટ્રીય સ્તરે આ બાબતે ભારે ચિંતા વ્યક્ત કરવામાં આવી રહી છે, કારણ કે આ બાળકોનું ભવિષ્ય અંધકારમય બનાવી તેમને હિંસાના માર્ગે વાળવામાં આવી રહ્યા છે.