રાજકોટ: દેશભરમાં હવામાનનો મિજાજ અત્યારે બદલાયેલો જોવા મળી રહ્યો છે, જેને કારણે ઉત્તરથી લઈને પૂર્વ ભારત સુધી કુદરતી આફતનો ખતરો મંડરાઈ રહ્યો છે. ભારતીય હવામાન વિભાગ (IMD) એ પશ્ચિમી વિક્ષેપ (વેસ્ટર્ન ડિસ્ટર્બન્સ) સક્રિય થવાને કારણે આગામી પાંચ દિવસ સુધી ભારે વરસાદ અને વાવાઝોડાની ચેતવણી જારી કરી છે. ઉત્તર પ્રદેશ, બિહાર, દિલ્હી અને રાજસ્થાન સહિત કુલ 19 રાજ્યો માટે એલર્ટ જાહેર કરવામાં આવ્યું છે. આ રાજ્યોમાં ૩૦ થી ૮૫ કિલોમીટર પ્રતિ કલાકની ઝડપે તેજ પવન ફૂંકાવાની શક્યતા છે, જે ખેતી અને સામાન્ય જનજીવન માટે મુશ્કેલી સર્જી શકે છે. પૂર્વી અને ઉત્તર-પૂર્વ ભારતના રાજ્યોમાં ૨૪ માર્ચ સુધી આ પ્રકારનો માહોલ યથાવત રહેવાની ધારણા છે.

હવામાન વિભાગના જણાવ્યા અનુસાર, બિહાર, પશ્ચિમ બંગાળ અને સિક્કિમના કેટલાક ભાગોમાં અતિભારે વરસાદની સાથે કરા પડવાની પણ સંભાવના છે. ઉત્તરાખંડ અને હિમાચલ પ્રદેશ જેવા પહાડી રાજ્યોમાં ૨૩ માર્ચથી ફરી એકવાર હિમવર્ષા અને વરસાદનો રાઉન્ડ શરૂ થઈ શકે છે. પૂર્વોત્તર રાજ્યોમાં આગામી પાંચ દિવસ સુધી વીજળીના કડાકા-ભડાકા સાથે વરસાદી માહોલ રહેશે. બીજી તરફ, મધ્ય ભારત અને મહારાષ્ટ્રના કેટલાક વિસ્તારોમાં પણ તેજ પવન સાથે હળવો થી મધ્યમ વરસાદ પડવાની આગાહી કરવામાં આવી છે. આ અણધાર્યા ફેરફારને કારણે ઉનાળાની શરૂઆતમાં જ ઠંડીનો અનુભવ થઈ રહ્યો છે.

દેશની રાજધાની દિલ્હીમાં શનિવારે ગાઢ ધુમ્મસ છવાઈ ગયું હતું, જેને કારણે લઘુત્તમ તાપમાન મોસમી સરેરાશ કરતા ૩.૫ ડિગ્રી ઘટીને ૧૩ ડિગ્રી સેલ્સિયસ નોંધાયું હતું. દિલ્હીમાં છેલ્લા છ વર્ષમાં માર્ચ મહિનાનો આ સૌથી ઠંડો દિવસ સાબિત થયો છે. સોમવારે સવારથી બપોર સુધી ગાજવીજ સાથે હળવો વરસાદ પડવાની સંભાવના છે. ઉત્તર પ્રદેશની રાજધાની લખનૌમાં પણ તાપમાન સામાન્ય કરતા લગભગ ૭.૯ ડિગ્રી ઓછું રહ્યું હતું. રાજસ્થાનના જોધપુર અને બિકાનેર જેવા વિસ્તારોમાં પણ રવિવારે વાવાઝોડા સાથે વરસાદની શક્યતા જોતા તંત્રને સતર્ક રહેવા સૂચના આપવામાં આવી છે.

હિમાચલ પ્રદેશના ઊંચાણવાળા વિસ્તારોમાં છેલ્લા પાંચ દિવસથી સતત હિમવર્ષા થઈ રહી છે, જેને કારણે તાપમાનમાં મોટો ઘટાડો નોંધાયો છે. મધ્ય અને નીચલા પહાડી વિસ્તારોમાં પણ વ્યાપક વરસાદને કારણે ઠંડીનો ચમકારો વધ્યો છે. જોકે, હવામાન વિભાગે એમ પણ જણાવ્યું છે કે આગામી થોડા દિવસોમાં ઉત્તર-પશ્ચિમ અને મધ્ય ભારતમાં મહત્તમ તાપમાનમાં ૩ થી ૮ ડિગ્રીનો વધારો જોવા મળશે. હાલમાં પશ્ચિમ બંગાળ અને સિક્કિમમાં કરા પડવાના એલર્ટને કારણે સ્થાનિકોને સાવચેત રહેવા જણાવાયું છે. પૂર્વી ભારતમાં તાપમાનમાં ઉતાર-ચઢાવનો આ દોર હજુ થોડા દિવસો સુધી ચાલુ રહેશે.