રાજકોટ: સિલિકોન વેલી ગણાતા બેંગલુરુના વ્યસ્ત રસ્તાઓ પર અત્યારે એક હાઈ-પ્રોફાઈલ સ્ટંટનો વીડિયો ચર્ચાનો વિષય બન્યો છે. સોશિયલ મીડિયા પર વાયરલ થયેલા આ ફૂટેજમાં એક વ્યક્તિ પોતાની કરોડોની કિંમતની લેમ્બોર્ગિની સુપરકાર સાથે જાહેર રસ્તા પર અત્યંત જોખમી રીતે ડ્રાઈવિંગ કરતો જોવા મળે છે. ફ્લાયઓવર નજીકની એક વ્યસ્ત ચોકડી પર આ ડ્રાઈવર વારંવાર પોતાની લક્ઝરી કારને ગોળ-ગોળ ફેરવી (Drifting) રહ્યો હતો, જ્યારે આસપાસથી અન્ય વાહનો પસાર થઈ રહ્યા હતા. આ પ્રકારના બેજવાબદાર વર્તનને કારણે મોટો અકસ્માત સર્જાવાની પૂરેપૂરી શક્યતા હતી, જેને પગલે નેટિઝન્સે આ નબીરા સામે કડક પગલાં લેવાની માંગ ઉઠાવી છે.

આ સમગ્ર ઘટનાની વિગતો મુજબ, @CitizenReprt નામના ઇન્સ્ટાગ્રામ હેન્ડલ દ્વારા આ વીડિયો શેર કરવામાં આવ્યો હતો. જેમાં સ્પષ્ટપણે જોઈ શકાય છે કે 'KA 05 NR 0009' રજિસ્ટ્રેશન નંબર ધરાવતી લેમ્બોર્ગિનીનો માલિક જાહેર માર્ગને પોતાનો અંગત રેસિંગ ટ્રેક સમજી બેઠો હતો. ટ્રાફિકના નિયમોના ધજાગરા ઉડાવતી આ ક્લિપમાં ડ્રાઈવર લક્ઝરી કારના ટાયર ઘસીને રસ્તા પર નિશાન બનાવી રહ્યો હતો. આ પોસ્ટમાં બેંગલુરુ ટ્રાફિક પોલીસને ટેગ કરીને તાત્કાલિક તપાસ કરવાની વિનંતી કરવામાં આવી હતી. આ વીડિયોએ શહેરના ટ્રાફિક મેનેજમેન્ટ અને અમીર નબીરાઓની મનમાની પર અનેક સવાલો ઉભા કર્યા છે.

વીડિયો વાયરલ થતાની સાથે જ બેંગલુરુ પોલીસે હરકતમાં આવીને ગુનો દાખલ કર્યો છે. પોલીસ દ્વારા સત્તાવાર નિવેદન બહાર પાડવામાં આવ્યું છે કે, કબ્બન પાર્ક ટ્રાફિક પોલીસ સ્ટેશનમાં આ ઘટના અંગે એફઆઈઆર (FIR) નોંધવામાં આવી છે અને જરૂરી કાનૂની કાર્યવાહી શરૂ કરી દેવામાં આવી છે. પોલીસે જણાવ્યું હતું કે, કાયદો બધા માટે સમાન છે અને જાહેર સુરક્ષા સાથે ચેડાં કરનાર કોઈપણ વ્યક્તિને બક્ષવામાં આવશે નહીં. હાલમાં પોલીસ સીસીટીવી ફૂટેજના આધારે વધુ તપાસ કરી રહી છે જેથી આ સ્ટંટબાજ ડ્રાઈવરની ધરપકડ કરી શકાય અને તેની લાયસન્સ રદ કરવા જેવી કડક સજા થઈ શકે.

આ વીડિયો પર લોકોની ઉગ્ર પ્રતિક્રિયાઓ જોવા મળી રહી છે. એક યુઝરે લખ્યું કે, "આ અત્યંત ખતરનાક છે, જાહેર રસ્તાઓ આવા જોખમી ખેલ માટે નથી." અન્ય એક વ્યક્તિએ આક્રોશ વ્યક્ત કરતા જણાવ્યું કે, "માત્ર મોંઘી કાર હોવાનો અર્થ એ નથી કે તમે અન્યના જીવ જોખમમાં મૂકી શકો." બેંગલુરુમાં ટ્રાફિકની સમસ્યા પહેલાથી જ ગંભીર છે, તેવામાં આવા સ્ટન્ટ્સ ટ્રાફિક જામ અને અકસ્માતોમાં વધારો કરે છે. પોલીસની ત્વરિત કાર્યવાહીને લોકોએ આવકારી છે, પરંતુ ભવિષ્યમાં આવા કિસ્સાઓ ન બને તે માટે દાખલારૂપ દંડ અને સજાની માંગણી કરવામાં આવી રહી છે.