મુંબઈ: મહારાષ્ટ્રમાં આગામી દિવસોમાં રાજકીય ગરમાવો વધુ તેજ થવાના સંકેતો મળી રહ્યા છે. મુખ્યમંત્રી દેવેન્દ્ર ફડણવીસે રવિવારે પૂર્વ મુખ્યમંત્રી ઉદ્ધવ ઠાકરેની આગેવાની હેઠળની તત્કાલીન મહાવિકાસ આઘાડી સરકાર પર આકરા પ્રહારો કર્યા છે. નાસિકના જ્યોતિષી અશોક ખરાટ સાથે સંકળાયેલા વિવાદાસ્પદ કેસનો ઉલ્લેખ કરતા ફડણવીસે પ્રશ્ન ઉઠાવ્યો હતો કે, આખરે એવી તે કેવી મજબૂરી હતી કે એક આશ્રમ માટે ખાસ કેબિનેટ બેઠક બોલાવવી પડી? તેમણે આક્ષેપ કર્યો હતો કે દારણા ડેમથી છેક 40 કિલોમીટર દૂર આવેલા શ્રી શિવનિકા સંસ્થાનને 39 લાખ લિટર પાણી પૂરું પાડવાનો નિર્ણય લેવામાં આવ્યો હતો, જે શાસન વ્યવસ્થા સામે ગંભીર સવાલો ઉભા કરે છે.

મુખ્યમંત્રી ફડણવીસે પત્રકારો સાથેની વાતચીતમાં સ્પષ્ટ કર્યું હતું કે, માત્ર કોઈની સાથે ફોટા હોવાથી ગુનેગાર સાબિત નથી થતું, પરંતુ સરકારી તંત્રનો ઉપયોગ કરીને કોઈ ખાસ વ્યક્તિ કે સંસ્થાને જે રીતે ફાયદો પહોંચાડવામાં આવ્યો છે તેની તપાસ થવી જોઈએ. તેમણે ઉમેર્યું કે, જે લોકો મહિલાઓના સન્માનની વાતો કરે છે તેઓ આ મુદ્દે કેમ મૌન છે? સરકારનો અભિગમ સ્પષ્ટ છે કે જ્યાં સુધી દરેક પીડિત મહિલાને ન્યાય નહીં મળે ત્યાં સુધી આરામ કરવામાં આવશે નહીં. આ વિવાદ હવે માત્ર પાણી પુરવઠાનો રહ્યો નથી, પરંતુ તે સત્તાના દુરુપયોગ અને નૈતિકતાના મુદ્દે ગરમાયો છે.
બીજી તરફ, રાજ્ય મહિલા આયોગના અધ્યક્ષ રૂપાલી ચકણકરના રાજીનામા અંગે પણ ફડણવીસે પ્રતિક્રિયા આપી હતી. તેમણે જણાવ્યું કે, જે વ્યક્તિ વિવાદોમાં હોય તેની સાથે ઘનિષ્ઠ સંબંધો ધરાવતા હોવાને કારણે ન્યાયની અપેક્ષા રાખી શકાય નહીં, તેથી તેમનું રાજીનામું યોગ્ય છે. આ મામલે ઉદ્ધવ ઠાકરેએ પણ વળતો પ્રહાર કરતા સરકારને પડકાર ફેંક્યો છે કે તેઓ ગમે તેટલી તપાસ કરી શકે છે. ઠાકરેએ આક્રમક વલણ અપનાવતા કહ્યું કે, તપાસમાં જો કંઈ ખોટું જણાય તો ચોક્કસ પગલાં લેવા જોઈએ, પછી ભલે તે કોઈ ધર્મગુરુ હોય કે રાજકીય નેતા, કોઈને છોડવા જોઈએ નહીં.
હાલમાં નાસિકના આશ્રમ અને તેને પૂરા પાડવામાં આવેલા પાણીના જથ્થાના અહેવાલોએ મહારાષ્ટ્રના રાજકીય વર્તુળોમાં ભારે હલચલ મચાવી દીધી છે. દારણા ડેમમાંથી મીરગાંવ સુધી પાણી પહોંચાડવા માટે કરવામાં આવેલા ખર્ચ અને લીધેલા નિર્ણયોની ફાઈલો ફરીથી ખુલવાની શક્યતા છે. સરકાર આ મામલે કડક વલણ અપનાવી રહી છે ત્યારે વિપક્ષ તેને રાજકીય બદલાની ભાવના ગણાવી રહ્યો છે. આગામી દિવસોમાં આ 'પાણી વિવાદ' કેટલું ઊંડું જાય છે અને તેમાં કયા મોટા માથાઓના નામ બહાર આવે છે તેના પર સમગ્ર રાજ્યની નજર ટકેલી છે.