મેન્લો પાર્ક: વિશ્વભરમાં લોકપ્રિય મેસેજિંગ પ્લેટફોર્મ વોટ્સએપ (WhatsApp) તેના વપરાશકર્તાઓની સુરક્ષા અને ગોપનીયતાને એક નવા જ સ્તરે લઈ જવા તૈયાર છે. કંપની ૨૦૨૬નું સૌથી મોટું પ્રાઈવસી અપડેટ 'આફ્ટર રીડિંગ' (After Reading) ફીચર લાવી રહી છે. આ સુવિધા એવા લોકો માટે વરદાન સમાન છે જેઓ પોતાની અંગત વિગતો કે સંવેદનશીલ માહિતી શેર કર્યા પછી તેને ચેટમાં રાખવા માંગતા નથી.
અત્યાર સુધી વોટ્સએપમાં 'ડિસેપિયરિંગ મેસેજ'નો વિકલ્પ હતો, જેમાં મેસેજ ગાયબ થવા માટે ઓછામાં ઓછો ૨૪ કલાકનો સમય લાગતો હતો. પરંતુ આ નવું ફીચર મેસેજની આયુષ્યને અત્યંત મર્યાદિત કરી દેશે. જેવો સામેવાળો વ્યક્તિ મેસેજ વાંચશે, કે તરત જ ૧૫ મિનિટનું 'ડેથ ટાઈમર' શરૂ થઈ જશે અને સમય પૂરો થતા જ મેસેજ બંને બાજુથી કાયમી ધોરણે ભૂંસાઈ જશે.
 
કેવી રીતે કામ કરશે આ જાદુઈ ફીચર?
•    ૧૫ મિનિટનું કાઉન્ટડાઉન: તમે જ્યારે આ મોડમાં મેસેજ મોકલો છો, ત્યારે પ્રાપ્તકર્તા મેસેજ ઓપન કરે તે ક્ષણથી જ ટાઈમર શરૂ થઈ જાય છે.
•    ઓટો-ડિલીટ: ટાઈમર પૂરું થતાની સાથે જ મેસેજ મોકલનાર અને મેળવનાર બંનેના ફોનમાંથી ગાયબ થઈ જશે. તમારે મેન્યુઅલી 'ડિલીટ ફોર એવરીવન' કરવાની જરૂર રહેશે નહીં.
•    જો મેસેજ ન વંચાય તો?: જો સામેવાળી વ્યક્તિ મેસેજ ખોલતી નથી, તો તે વધુમાં વધુ ૨૪ કલાક સુધી ચેટમાં રહેશે અને ત્યારબાદ પ્રાઈવસીને ધ્યાનમાં રાખીને આપમેળે ડિલીટ થઈ જશે.
 
કોના માટે આ સુવિધા સૌથી વધુ ઉપયોગી?
રોજિંદા જીવનમાં આપણે ઘણીવાર વોટ્સએપ પર એવી માહિતી મોકલીએ છીએ જે લાંબો સમય ચેટમાં રહેવી જોખમી હોઈ શકે છે. આ ફીચર ખાસ કરીને નીચે મુજબના કિસ્સાઓમાં રક્ષણ આપશે:
૧. OTP અને પાસવર્ડ: બેંકિંગ કે લોગિન માટે મોકલેલા વન-ટાઇમ પાસવર્ડ.
૨. લોકેશન શેરિંગ: કોઈને કામચલાઉ સરનામું કે લાઈવ લોકેશન આપ્યું હોય ત્યારે.
૩. પર્સનલ ડોક્યુમેન્ટ્સ: પાનકાર્ડ, આધારકાર્ડ કે ખાનગી ફોટોગ્રાફ્સ જે વાંચ્યા પછી ડિલીટ થવા જરૂરી છે.
ટેકનિકલ અપડેટ અને રોલઆઉટ
WABetaInfo ના અહેવાલ મુજબ, આ ફીચર હાલમાં એન્ડ્રોઇડ બીટા વર્ઝન ૨.૨૬.૧૨.૨ માં જોવા મળ્યું છે. રસપ્રદ વાત એ છે કે જો તમે 'બ્લુ ટિક' (Read Receipt) બંધ રાખી હશે, તો પણ સિસ્ટમ મેસેજ વાંચ્યાની ૧૫ મિનિટમાં તેને ડિલીટ કરી જ દેશે. હાલમાં આ ફીચર ડેવલપમેન્ટ સ્ટેજમાં છે અને ટૂંક સમયમાં તમામ ગ્લોબલ યુઝર્સ માટે ઉપલબ્ધ થશે.
ડિજિટલ પ્રાઈવસીના આ યુગમાં વોટ્સએપનું આ પગલું ડેટા લીક થવાના જોખમોને સાવ નહિવત કરી દેશે. હવે તમારી ચેટ માત્ર તમારી અને સામેવાળી વ્યક્તિ વચ્ચે જ રહેશે, તે પણ માત્ર ૧૫ મિનિટ માટે!