હનોઈ, તા. 24: વિયેતનામની મુલાકાતે આવતા પ્રવાસીઓ માટે જેનું નામ ટોપ લિસ્ટમાં હોય છે, તે હનોઈની પ્રખ્યાત 'રેલવે કાફે સ્ટ્રીટ' હવે કદાચ પહેલા જેવી જોવા નહીં મળે. શહેરના સાંકડા રહેણાંક વિસ્તારો અને કાફેની બિલકુલ બાજુમાંથી પસાર થતી ટ્રેનોનો રોમાંચક નજારો હવે બંધ થવા જઈ રહ્યો છે. હનોઈ પીપલ્સ કમિટીએ એક મહત્વાકાંક્ષી શહેરી વિકાસ યોજના રજૂ કરી છે, જે હેઠળ આ વ્યસ્ત રૂટ પરથી પેસેન્જર ટ્રેનોની અવરજવર કાયમ માટે અટકાવી દેવામાં આવશે.
કેમ લેવાયો આ સખત નિર્ણય?
વર્ષોથી આ સાંકડી શેરી દુનિયાભરના પ્રવાસીઓ અને ફોટોગ્રાફર્સ માટે આકર્ષણનું કેન્દ્ર રહી છે. જોકે, ટ્રેકની સાવ નજીક બેસીને કોફી પીતા પ્રવાસીઓ માટે જોખમ વધતું જતું હતું. વિયેતનામ રેલવેએ અનેકવાર સુરક્ષા ચેતવણીઓ આપી હતી. હવે, આધુનિકીકરણના ભાગરૂપે:
•    દક્ષિણ તરફથી આવતી ટ્રેનો હનોઈ સ્ટેશન પર જ અટકી જશે.
•    ઉત્તરથી આવતી ટ્રેનો ગિયા લામ સ્ટેશન પર રોકાશે.
•    આ બંને સ્ટેશન વચ્ચેનો જે સાંકડો વિભાગ છે, જ્યાં કાફે આવેલા છે, ત્યાંથી ટ્રેન ટ્રાફિક સંપૂર્ણપણે દૂર કરવામાં આવશે.
ઐતિહાસિક વારસો: આ ફેરફાર પાછળનું બીજું મુખ્ય કારણ 'લોંગ બિએન બ્રિજ' અને આસપાસના ઐતિહાસિક માળખાનું સંરક્ષણ છે. ફ્રેન્ચ કાળના આ વારસાને સાચવવા માટે ફ્રેન્ચ એમ્બેસીની મદદથી ટેકનિકલ અભ્યાસ શરૂ કરવામાં આવ્યો છે.
પ્રવાસન પર કેવી પડશે અસર?
હનોઈ ટ્રેન સ્ટ્રીટ તેના વાયરલ વીડિયો અને અનોખા અનુભવ માટે જાણીતી છે. ૨૦૨૬ ના બીજા ક્વાર્ટર સુધીમાં આ વિસ્તારને એક સાંસ્કૃતિક અને હેરિટેજ ઝોન તરીકે વિકસાવવાની યોજના છે. જોકે, પ્રવાસીઓ જે 'જીવંત ટ્રેન' જોવા આવતા હતા, તે અનુભવ હવે ભૂતકાળ બની જશે. તંત્ર આ વિસ્તારને થાંગ લોંગ શાહી કિલ્લા અને ઓલ્ડ ક્વાર્ટર સાથે જોડીને એક નવું ટૂરિઝમ સર્કિટ બનાવવા માંગે છે, જેથી ઇતિહાસ અને આધુનિકતાનો સંગમ થઈ શકે.