બ્રેસિયા (ઈટાલી), તા. 24: વિદેશમાં પંજાબી અને શીખ સમુદાયનો દબદબો માત્ર કેનેડા કે યુકે પૂરતો મર્યાદિત નથી, હવે ઈટાલીનું બ્રેસિયા શહેર પણ 'મિની પંજાબ' તરીકે ઓળખાઈ રહ્યું છે. તાજેતરમાં 22 માર્ચના રોજ, બ્રેસિયાની શેરીઓ "કેસરી" રંગમાં રંગાઈ ગઈ હતી. નિમિત્ત હતું શીખ નવા વર્ષની ભવ્ય ઉજવણી. ઢોલના ધબકારા, નાગરોનો નાદ અને પરંપરાગત માર્શલ આર્ટ 'ગતકા'ના પ્રદર્શન સાથે ઈટાલીના આ શહેરમાં પંજાબી સંસ્કૃતિનો અનોખો સંગમ જોવા મળ્યો હતો.
પરમેસન ચીઝ અને શીખ સમુદાયનો અતૂટ સંબંધ
ઉત્તરી ઈટાલીના કૃષિ ક્ષેત્રમાં શીખ સમુદાયનો ફાળો અત્યંત મહત્વનો છે. ખાસ કરીને વિશ્વવિખ્યાત પરમેસન ચીઝ (Parmesan Cheese) ના ડેરી ઉત્પાદનમાં હજારો પંજાબી યુવાનો દિવસ-રાત મહેનત કરી રહ્યા છે. ઈટાલિયન નાગરિકો પણ સ્વીકારે છે કે આ પ્રદેશના આર્થિક વિકાસમાં ભારતીય ઈમિગ્રન્ટ્સની ભૂમિકા પાયાની છે. બ્રેસિયા હવે વિદેશી પંજાબીઓ માટે કેનેડાના બ્રેમ્પટન કે સરે જેવું જ એક મજબૂત કેન્દ્ર બની ગયું છે.
નગર કીર્તન: ભક્તિ અને શક્તિનો સંગમ
ગુરુદ્વારા સિંઘ સભા ફ્લેરો દ્વારા આયોજિત આ નગર કીર્તનની શરૂઆત પવિત્ર શ્રી ગુરુ ગ્રંથ સાહિબ ના આશીર્વાદ અને 'પંજ પ્યારે' ના નેતૃત્વમાં વાયા કોર્સિકાથી થઈ હતી.
•    લંગરની સેવા: સમગ્ર રૂટ પર શ્રદ્ધાળુઓ માટે ભવ્ય લંગરની વ્યવસ્થા કરવામાં આવી હતી, જેમાં ઈટાલિયન સ્થાનિકોએ પણ હોંશે હોંશે પ્રસાદ ગ્રહણ કર્યો હતો.
•    ધાર્મિક ઉત્સાહ: રાગી અને ધાડી જથ્થાઓએ શીખ ઇતિહાસના ગૌરવગાન કર્યા હતા, જેનાથી વાતાવરણ ભક્તિમય બની ગયું હતું.
વર્લ્ડ શીખ સોલ્જર્સ મેમોરિયલ સોસાયટીના પ્રીથિપાલ સિંહે જણાવ્યું કે, આ ઉજવણી માત્ર ધાર્મિક નહોતી, પરંતુ ઇટાલિયન અને ભારતીય સંસ્કૃતિ વચ્ચેના જોડાણનું પ્રતીક હતી. હવે સમુદાય એપ્રિલમાં આવનારા વૈશાખીના તહેવારની આતુરતાથી રાહ જોઈ રહ્યો છે, જેમાં ફરી એકવાર ઈટાલીના રસ્તાઓ પર ખાલસાનો રંગ જોવા મળશે.