મુંબઈ: ભારતીય શેરબજારના ઇતિહાસમાં એક નવો આંકડો લખાવા જઈ રહ્યો છે. એશિયાના સૌથી ધનિક વ્યક્તિ મુકેશ અંબાણી પોતાની ટેલિકોમ અને AI દિગ્ગજ કંપની રિલાયન્સ Jio પ્લેટફોર્મ્સને શેરબજારમાં લિસ્ટ કરવાની તૈયારી કરી રહ્યા છે. જેફરીઝના અંદાજ મુજબ, Jioનું મૂલ્યાંકન અકલ્પનીય $180 બિલિયન (અંદાજે ₹15 લાખ કરોડથી વધુ) છે, જે તેને ભારતનો અત્યાર સુધીનો સૌથી મોટો અને સૌથી પ્રતિક્ષિત IPO બનાવી શકે છે.
શું હશે IPOનું માળખું?
સૂત્રોના જણાવ્યા અનુસાર, રિલાયન્સ Jio આશરે $4 બિલિયન એકત્ર કરવા માટે 'ઓફર ફોર સેલ' (OFS) મોડલ અપનાવી શકે છે. આનો અર્થ એ છે કે કંપનીના વર્તમાન મોટા રોકાણકારો તેમનો હિસ્સો ઘટાડશે. હ્યુન્ડાઈ ઇન્ડિયાએ પણ તાજેતરમાં આ જ મોડલથી રોકાણકારોને આકર્ષ્યા હતા.
ભારતના અત્યાર સુધીના 5 સૌથી મોટા IPO પર એક નજર
Jio ના સંભવિત લિસ્ટિંગ પહેલા, ભારતીય બજારમાં આ પાંચ દિગ્ગજોએ પોતાનું નામ સુવર્ણ અક્ષરે લખાવ્યું છે:
1.    હ્યુન્ડાઈ મોટર ઇન્ડિયા (ઓક્ટોબર 2024): ₹278.7 અબજ સાથે હાલમાં ભારતનો સૌથી મોટો IPO છે.
2.    LIC (મે 2022): સરકારે ₹205 અબજ એકત્ર કર્યા હતા, જોકે લિસ્ટિંગ વખતે શેર 8% ઘટ્યા હતા.
3.    Paytm (નવેમ્બર 2021): ₹183 અબજ એકત્ર કર્યા, પણ લિસ્ટિંગના દિવસે જ 27% નો મોટો ઘટાડો જોવો પડ્યો હતો.
4.    ટાટા કેપિટલ (ઓક્ટોબર 2025): ₹155 અબજ સાથે NBFC સેક્ટરનો સૌથી મોટો IPO સાબિત થયો.
5.    LG ઇલેક્ટ્રોનિક્સ ઇન્ડિયા (ઓક્ટોબર 2025): ₹116 અબજ એકત્ર કર્યા અને પહેલા જ દિવસે શેરમાં 50% નો ઉછાળો જોવા મળ્યો હતો.
રોકાણકારોમાં ભારે ઉત્તેજના
તાજેતરમાં LG ઇન્ડિયાના IPO ને જેવો પ્રતિસાદ મળ્યો (54 વખત ઓવરસબ્સ્ક્રાઇબ), તે જોતા બજારના નિષ્ણાતો માને છે કે Jio નો IPO તમામ જૂના રેકોર્ડ તોડી શકે છે. કંપનીની મજબૂત કનેક્ટિવિટી અને ભવિષ્યની AI ટેકનોલોજીને જોતા રિટેલ રોકાણકારો પણ અત્યારથી જ આ આઈપીઓની રાહ જોઈ રહ્યા છે.
જો બધું યોજના મુજબ ચાલશે, તો ૨૦૨૬ના અંત સુધીમાં રિલાયન્સ Jio ભારતીય શેરબજારનું સૌથી મોટું આકર્ષણ બની રહેશે.