મુંબઈ: બોક્સ ઓફિસ પર ધૂમ મચાવી રહેલી ફિલ્મ 'ધુરંધર 2' અત્યારે માત્ર તેની એક્શનને કારણે જ નહીં, પરંતુ તેમાં દર્શાવવામાં આવેલા વાસ્તવિક પાત્રોને કારણે પણ ચર્ચામાં છે. આ ફિલ્મમાં ભારતીય જાસૂસોની શૌર્યગાથાની સાથે અંડરવર્લ્ડ ડોન દાઉદ ઇબ્રાહિમના પાત્રનો પણ પરિચય કરાવવામાં આવ્યો છે. મુંબઈની ગલીઓમાંથી શરૂ થયેલો ગુનાખોરીનો આ કાળો અધ્યાય હવે કરાચીના એક ખૂણામાં કેવી રીતે અંત તરફ જઈ રહ્યો છે, તેનું આબેહૂબ ચિત્રણ ફિલ્મમાં જોવા મળે છે.
મુંબઈના સપના અને ગુનાખોરીની શરૂઆત
૭૦ અને ૮૦ના દાયકામાં મુંબઈમાં દાણચોરી અને ગેરકાયદેસર ધંધાઓનું નેટવર્ક કેવી રીતે ફેલાયું હતું, તેનો સંદર્ભ ફિલ્મમાં વણી લેવામાં આવ્યો છે. એક સમયે જેનું નામ સાંભળીને આખું મુંબઈ થરથર કાંપતું હતું, તે દાઉદ ઇબ્રાહિમ કેવી રીતે પાકિસ્તાની ગુપ્તચર સંસ્થા ISI ના હાથા તરીકે વપરાયો, તેની વાસ્તવિકતા 'ધુરંધર 2' માં 'બડે સાહેબ' ના પાત્ર દ્વારા દર્શાવવામાં આવી છે. જોકે, ફિલ્મ તેને કોઈ 'હીરો' તરીકે નહીં, પરંતુ ઈતિહાસના એક કાળા પ્રકરણ તરીકે રજૂ કરે છે.
ખૌફનો પર્યાય હવે માત્ર એક બિમાર વૃદ્ધ
અભિનેતા દાનિશ ઇકબાલે આ ફિલ્મમાં દાઉદનું પાત્ર ભજવ્યું છે. ફિલ્મમાં તે કોઈ શક્તિશાળી ડોન તરીકે નહીં, પરંતુ એક અત્યંત બીમાર, ખાંસી ખાતા અને પથારીવશ લાચાર માણસ તરીકે દેખાય છે. જે માણસે આતંકવાદી નેટવર્ક દ્વારા ભારતને નિશાન બનાવ્યું હતું, તે હવે કરાચીમાં શારીરિક અને માનસિક રીતે ભાંગી પડ્યો હોય તેમ બતાવવામાં આવ્યો છે. ફિલ્મમાં તેની કોઈ ભવ્ય એન્ટ્રી નથી, ઉલટાનું તેને એક અપ્રસ્તુત થઈ ગયેલા પાત્ર તરીકે દર્શાવીને તેની રહસ્યમયતા તોડવાનો પ્રયાસ થયો છે.
સત્તા ગઈ, હવે માત્ર સ્મૃતિઓ બાકી
'ધુરંધર 2' ની વાર્તા એ વાત પર ભાર મૂકે છે કે ગમે તેવો શક્તિશાળી અપરાધી કેમ ન હોય, સમય જતાં તેની શક્તિ ક્ષીણ થાય જ છે. આજે દાઉદ દ્વારા ઉભું કરાયેલું નેટવર્ક બીજા લોકો ચલાવી રહ્યા છે અને તે પોતે માત્ર એક ખૂણામાં પડ્યો છે. આ ફિલ્મ જાસૂસી દુનિયાના મોટા પડયંત્રોની વચ્ચે એક સ્પષ્ટ સંદેશ આપે છે: જેનો ઉદય અન્યાયી હોય છે, તેનો અસ્ત હંમેશા આવો જ દયનીય હોય છે.