બ્રેમ્પટન:  કેનેડાનું બ્રેમ્પટન શહેર ફરી એકવાર ગેંગવોરના ભયાનક અવાજથી ધ્રૂજી ઉઠ્યું છે. કુખ્યાત ગેંગસ્ટર ગોલ્ડી બ્રાર અને રોહિત ગોદારા ગેંગે સતત બીજા દિવસે લોહિયાળ ખેલ ખેલતા વિપિન ચૌસર નામના વ્યક્તિના નિવાસસ્થાનને નિશાન બનાવ્યું છે. આ હુમલાની સૌથી ચોંકાવનારી બાબત એ છે કે ગેંગના સભ્યો મહેન્દ્ર ડેલાના અને સન્ની યમ દ્વારા ગોળીબારનો વીડિયો સોશિયલ મીડિયા પર શેર કરવામાં આવ્યો છે. આ વીડિયો દ્વારા ગેંગે માત્ર હુમલાની જવાબદારી જ નથી સ્વીકારી, પરંતુ કેનેડામાં બેસીને ભારતીય મૂળના લોકો પર પોતાનો સકંજો જમાવવાનો ખુલ્લેઆમ પ્રયાસ કર્યો છે, જેનાથી સ્થાનિક પોલીસ અને સુરક્ષા એજન્સીઓની ઊંઘ હરામ થઈ ગઈ છે.

ગેંગ દ્વારા જારી કરવામાં આવેલી ધમકીભરી પોસ્ટમાં લખવામાં આવ્યું છે કે, "આ તો માત્ર એક ટ્રેલર છે. જે કોઈ પણ અમારા દુશ્મનોને આર્થિક કે નૈતિક ટેકો આપશે, તેણે પરિણામ ભોગવવા તૈયાર રહેવું પડશે." વિપિન ચૌસર પર આરોપ મૂકતા ગેંગે જણાવ્યું કે તે તેમના વિરોધી જૂથોને મદદ કરી રહ્યો હતો, અને જો તે ૨૪ કલાકમાં પોતાનો માર્ગ નહીં સુધારે તો આગામી ગોળીબાર ઘરની બહાર નહીં પણ ઘરની અંદર પરિવાર પર કરવામાં આવશે. આ હુમલા પાછળ ખંડણી (Extortion) અથવા ગેંગના આદેશોનું પાલન ન કરવાનું કારણ માનવામાં આવી રહ્યું છે. ૨૩ માર્ચના હુમલા બાદ તરત જ થયેલા આ બીજા હુમલાએ કેનેડામાં ગેંગસ્ટરોની વધતી પહોંચ અને આત્મવિશ્વાસનો પુરાવો આપ્યો છે.

કેનેડાની ધરતી પર ભારતીય ગેંગસ્ટરો વચ્ચે ચાલી રહેલી આ લડાઈ હવે લોહિયાળ વળાંક લઈ રહી છે. ગોલ્ડી બ્રાર ગેંગે ચેતવણી આપી છે કે તેમની ક્ષમતા અને પહોંચ ઘણી ઊંડી છે અને કોઈપણ સુરક્ષા તેમને બચાવી શકશે નહીં. ૨૪ કલાકના અલ્ટીમેટમ બાદ બ્રેમ્પટનમાં સુરક્ષા કડક કરી દેવામાં આવી છે, પરંતુ સોશિયલ મીડિયા પર જે રીતે આ ગેંગ સક્રિય છે તે જોતા ભવિષ્યમાં વધુ હિંસક ઘટનાઓ બનવાની આશંકા સેવાઈ રહી છે. આ ઘટનાએ કેનેડા અને ભારત વચ્ચેના રાજદ્વારી સંબંધોમાં પણ તણાવ વધાર્યો છે, કારણ કે ભારત લાંબા સમયથી કેનેડા પર આ ગેંગસ્ટરોને આશરો આપવાનો આરોપ લગાવી રહ્યું છે.