વોશિંગ્ટન, તા.25: અમેરિકાના આકાશમાં અત્યારે મુસાફરીનો આનંદ નહીં, પણ આર્થિક અને રાજકીય ખેંચતાણનો ભાર વર્તાઈ રહ્યો છે. હોમલેન્ડ સિક્યુરિટી વિભાગના બજેટને લઈને સેનેટમાં સર્જાયેલી મડાગાંઠ હવે એરપોર્ટ પર સામાન્ય મુસાફરો માટે આફત બની ગઈ છે. એટલાન્ટા, હ્યુસ્ટન અને ન્યૂ યોર્ક જેવા વ્યસ્ત એરપોર્ટ્સ પર સુરક્ષાની લાઈનો એટલી લાંબી થઈ ગઈ છે કે મુસાફરોને તેમની ફ્લાઈટના 4-5 કલાક પહેલાં એરપોર્ટ પહોંચવાની સલાહ આપવામાં આવી રહી છે.
પગાર વગર કામ કરતા કર્મચારીઓનો રોષ
હોમલેન્ડ સિક્યુરિટી વિભાગનું ભંડોળ અટકી જવાથી ટ્રાન્સપોર્ટેશન સિક્યુરિટી એડમિનિસ્ટ્રેશન (TSA) ના હજારો કર્મચારીઓ અત્યારે પગાર વગર કામ કરી રહ્યા છે. રિપોર્ટ અનુસાર, લગભગ 11% કર્મચારીઓએ કામ પર આવવાનું બંધ કરી દીધું છે, જ્યારે સેંકડો લોકોએ નોકરી છોડી દીધી છે. ટર્મિનલ્સ પર સુરક્ષા તપાસ માટે કર્મચારીઓની અછતને કારણે સ્થિતિ બેકાબૂ બની રહી છે. હ્યુસ્ટનના એરપોર્ટ પર તો સુરક્ષાની લાઈનો અનેક માળ સુધી લંબાયેલી જોવા મળી હતી.
રાજકીય અખાડો અને ટ્રમ્પનો રૂખ
આ સમગ્ર વિવાદના કેન્દ્રમાં ઇમિગ્રેશન નીતિ છે. ડેમોક્રેટ્સ ઇમિગ્રેશન અમલીકરણ (ICE) પર કડક નિયંત્રણો મૂકવાની માંગ કરી રહ્યા છે, જ્યારે રાષ્ટ્રપતિ ડોનાલ્ડ ટ્રમ્પ તેમના દેશનિકાલના એજન્ડામાં કોઈ બાંધછોડ કરવા તૈયાર નથી. ટ્રમ્પે વ્હાઇટ હાઉસમાં સ્પષ્ટ સંકેત આપ્યો હતો કે તેઓ હાલના કોઈ પણ કાચા સોદાથી ખુશ નથી. બીજી તરફ, સેનેટર્સ આ શટડાઉનનો અંત લાવવા માટે દિવસ-રાત એક કરી રહ્યા છે જેથી એરપોર્ટ પરની 'ગાંડપણ' જેવી સ્થિતિ રોકી શકાય.
ડેલ્ટા એર લાઈન્સનો મોટો નિર્ણય
આ રાજકીય લડાઈની અસર હવે નેતાઓ પર પણ પડી રહી છે. ડેલ્ટા એર લાઈન્સે જાહેરાત કરી છે કે શટડાઉન દરમિયાન તેઓ કોંગ્રેસના સભ્યો (MPs) ને મળતી વિશેષ સેવાઓ બંધ કરી દેશે. હવે નેતાઓએ પણ સામાન્ય મુસાફરોની જેમ જ લાઈનમાં ઉભા રહેવું પડશે અને સામાન્ય સ્ટેટસ સાથે મુસાફરી કરવી પડશે.
નવા સેક્રેટરી અને બદલાતી સ્થિતિ
વિવાદો વચ્ચે ટ્રમ્પે ક્રિસ્ટી નોએમને હટાવીને ઓક્લાહોમાના ભૂતપૂર્વ સેનેટર માર્કવેન મુલિનને નવા હોમલેન્ડ સિક્યુરિટી સેક્રેટરી તરીકે નિયુક્ત કર્યા છે. મુલિને ડેમોક્રેટ્સની અમુક માંગણીઓ, જેમ કે લોકોના ઘરની તપાસ માટે ન્યાયાધીશના વોરંટની અનિવાર્યતા, સ્વીકારવાના સંકેત આપ્યા છે. શું આ નવા ચહેરા સાથે અમેરિકાની આંતરિક સુરક્ષા અને એરપોર્ટ પરની અરાજકતાનો અંત આવશે? તે જોવું રહ્યું.