નવી દિલ્હી, તા.25: પશ્ચિમ એશિયા (મધ્ય પૂર્વ)માં સતત બદલાઈ રહેલી ભૌગોલિક અને રાજકીય પરિસ્થિતિને કારણે આંતરરાષ્ટ્રીય હવાઈ સફર પર જોખમના વાદળો ઘેરાયા છે. ભારતની દિગ્ગજ એરલાઈન્સ ઈન્ડિગો અને એર ઈન્ડિયાએ આજે એક મહત્વપૂર્ણ એડવાઈઝરી જારી કરીને મુસાફરોને સાવધ કર્યા છે. મધ્ય પૂર્વના દેશોમાં વધતા તણાવને જોતા ફ્લાઈટના શેડ્યૂલમાં ગમે ત્યારે ફેરફાર અથવા વિક્ષેપ આવી શકે તેવી શક્યતા વ્યક્ત કરવામાં આવી છે.
ઈન્ડિગોની 'સેફ્ટી ફર્સ્ટ' પોલિસી
ઈન્ડિગો એરલાઈન્સે સ્પષ્ટ કર્યું છે કે મુસાફરોની સુરક્ષા તેમની સર્વોચ્ચ પ્રાથમિકતા છે. એરલાઈન્સે જણાવ્યું કે, "મધ્ય પૂર્વની વર્તમાન સ્થિતિને ધ્યાનમાં રાખીને અમે સમયપત્રકમાં ફેરફાર કરી રહ્યા છીએ. મુસાફરોને વિનંતી છે કે તેઓ ઘરેથી નીકળતા પહેલા એરપોર્ટ પર જવા માટે તેમની ફ્લાઈટનું લેટેસ્ટ સ્ટેટસ ઓનલાઈન ચેક કરી લે." કંપનીની સપોર્ટ ટીમ પ્રભાવિત મુસાફરોને સીધો સંપર્ક કરી રહી છે જેથી તેમને પડતી મુશ્કેલી ઓછી કરી શકાય.
એર ઈન્ડિયાનું 'મિશન વેસ્ટ એશિયા'
બીજી તરફ, એર ઈન્ડિયા અને એર ઈન્ડિયા એક્સપ્રેસે પણ કમર કસી લીધી છે. આજે 25 માર્ચ, 2026ના રોજ આ બંને એરલાઈન્સ સંયુક્ત રીતે પશ્ચિમ એશિયાના રૂટ પર કુલ 26 ફ્લાઈટ્સનું સંચાલન કરશે. જેમાં કેટલીક નિયમિત શેડ્યૂલ્ડ ફ્લાઈટ્સ હશે તો કેટલીક વિશેષ (નોન-શેડ્યૂલ્ડ) સેવાઓ હશે. એર ઈન્ડિયા ગ્રુપ સતત સંબંધિત અધિકારીઓના સંપર્કમાં છે જેથી આકાશમાં વિમાનની સુરક્ષિત અવરજવર સુનિશ્ચિત કરી શકાય.
મુસાફરો માટે મહત્વની સૂચના
જો તમે અથવા તમારા કોઈ સગા-સંબંધી આજે ખાડી દેશો કે મધ્ય પૂર્વના અન્ય કોઈ દેશમાં મુસાફરી કરવાના હોય, તો એરલાઈન્સની સત્તાવાર વેબસાઈટ કે સોશિયલ મીડિયા હેન્ડલ્સ પર નજર રાખવી અનિવાર્ય છે. યુદ્ધ જેવી સ્થિતિમાં ઘણીવાર એરસ્પેસ (હવાઈ માર્ગ) બંધ થવાને કારણે ફ્લાઈટ્સના રૂટ ડાયવર્ટ કરવા પડે છે અથવા ફ્લાઈટ કેન્સલ કરવી પડે છે.
ભારતીય એરલાઈન્સ હાલમાં કનેક્ટિવિટી જાળવી રાખવા અને મુસાફરોને સુરક્ષિત રીતે તેમના ગંતવ્ય સ્થાન સુધી પહોંચાડવા માટે યુદ્ધના ધોરણે કામ કરી રહી છે.