લંડન : વિશ્વભરમાં સાયલન્ટ કિલર ગણાતા હાઈ કોલેસ્ટ્રોલની સારવારમાં હવે એક ક્રાંતિકારી વળાંક આવ્યો છે. અત્યાર સુધી જે દર્દીઓને સ્ટેટિન્સ જેવી ગોળીઓથી ફાયદો નહોતો થતો, તેમને PCSK9i જેવા અત્યંત મોંઘા અને પીડાકારક ઈન્જેક્શન લેવા પડતા હતા. પરંતુ, તાજેતરના સંશોધનમાં 'Anlicitide' નામની એક એવી મૌખિક ગોળી  વિકસાવવામાં આવી છે, જે ઇન્જેક્શન જેટલી જ શક્તિશાળી અસર બતાવે છે. ક્લિનિકલ ટ્રાયલ્સમાં સાબિત થયું છે કે આ ગોળી લોહીમાં રહેલા ઘાતક ગણાતા LDL (ખરાબ કોલેસ્ટ્રોલ) ને 60% સુધી ઘટાડી શકે છે. આ સમાચાર હૃદયરોગના હુમલા અને સ્ટ્રોકના જોખમ હેઠળ જીવતા કરોડો લોકો માટે મોટી રાહત સમાન છે.

આ જાદુઈ ગોળી કામ કરવાની પદ્ધતિ અત્યંત અનોખી છે. આપણા શરીરમાં લિવર લોહીમાંથી કોલેસ્ટ્રોલ સાફ કરવાનું કામ કરે છે, પરંતુ અમુક ચોક્કસ પ્રોટીન આ પ્રક્રિયામાં અવરોધ ઊભો કરે છે. Anlicitide સીધું જ તે અવરોધક પ્રોટીનને ટાર્ગેટ કરે છે, જેનાથી લિવર વધુ ક્ષમતા સાથે નસોમાં જામેલી ચરબીને ખેંચી લે છે. સૌથી મહત્વની વાત એ છે કે આ દવાની કોઈ ગંભીર આડઅસર જોવા મળી નથી. નિષ્ણાતોના મતે, આ ગોળી માત્ર અસરકારક જ નથી પણ ઈન્જેક્શનની સરખામણીએ ઘણી સસ્તી સાબિત થશે, જેના કારણે સામાન્ય મધ્યમ વર્ગના દર્દીઓ પણ સરળતાથી સારવાર કરાવી શકશે અને હોસ્પિટલના લાંબા ખર્ચમાંથી બચી શકશે.

આરોગ્ય નિષ્ણાતો આ શોધને મેડિકલ સાયન્સમાં 'ગેમ-ચેન્જર' માની રહ્યા છે. નસોમાં કોલેસ્ટ્રોલ જમા થવાને કારણે રક્ત પ્રવાહ અવરોધાય છે, જે આખરે હાર્ટ ફેલ્યોરનું કારણ બને છે. જો આ ગોળી આગામી સમયમાં મોટા પાયે બજારમાં ઉપલબ્ધ થશે, તો હાર્ટ એટેકના કેસમાં ધરખમ ઘટાડો જોવા મળી શકે છે. હાલમાં આ દવાના અંતિમ તબક્કાના પરીક્ષણો ચાલી રહ્યા છે અને ટૂંક સમયમાં તેને વૈશ્વિક મંજૂરી મળવાની શક્યતા છે. ડોક્ટરો સલાહ આપી રહ્યા છે કે જ્યાં સુધી આ દવા બજારમાં ન આવે ત્યાં સુધી દર્દીઓએ પોતાની વર્તમાન દવાઓ ચાલુ રાખવી અને જીવનશૈલીમાં સુધારો કરવો અનિવાર્ય છે.