નવી દિલ્હી: વર્ષ 2026 ના 'QS વર્લ્ડ યુનિવર્સિટી રેન્કિંગ' એ સાબિત કરી દીધું છે કે ભારત હવે વિશ્વનું નવું એજ્યુકેશન હબ બની રહ્યું છે. આ વર્ષના રેન્કિંગમાં ભારતની પ્રતિષ્ઠિત સંસ્થા IIM અમદાવાદે મેનેજમેન્ટ અને માર્કેટિંગના ક્ષેત્રમાં વિશ્વભરમાં 21મું સ્થાન પ્રાપ્ત કરીને ઈતિહાસ રચી દીધો છે. માત્ર IIM જ નહીં, પરંતુ IIT ધનબાદે પણ મિનરલ અને માઇનિંગ એન્જિનિયરિંગમાં વૈશ્વિક સ્તરે 21મો ક્રમ મેળવીને પોતાની તાકાત બતાવી છે. ભારતે આ વર્ષે વિવિધ વિષયોમાં ટોચની 50 સંસ્થાઓમાં કુલ 27 સ્થાન મેળવ્યા છે, જે 2024 ની સરખામણીએ બમણાથી પણ વધુ છે, જે દર્શાવે છે કે ભારતીય શિક્ષણની ગુણવત્તામાં ક્રાંતિકારી સુધારો થયો છે.

એન્જિનિયરિંગ ક્ષેત્રે IIT દિલ્હી આ વર્ષે ખરા અર્થમાં 'સુપરસ્ટાર' સાબિત થયું છે. તેના છ અલગ-અલગ વિદ્યાશાખાઓએ વિશ્વના ટોચના 50 માં સ્થાન મેળવ્યું છે, જેમાં ઇલેક્ટ્રિકલ એન્જિનિયરિંગ (36મો ક્રમ) અને કેમિકલ એન્જિનિયરિંગ (48મો ક્રમ) મુખ્ય છે. મિકેનિકલ અને એરોનોટિકલ એન્જિનિયરિંગમાં પણ સંસ્થાએ છેલ્લા એક દાયકાનું સર્વશ્રેષ્ઠ પ્રદર્શન કર્યું છે. આ ઉપરાંત, દેશની પાંચ ટોચની IIT (દિલ્હી, બોમ્બે, મદ્રાસ, ખડગપુર અને કાનપુર) એ એન્જિનિયરિંગ અને ટેકનોલોજીની વૈશ્વિક ટોપ-100 યાદીમાં પોતાનું સ્થાન જાળવી રાખીને ભારતનો તિરંગો બુલંદ રાખ્યો છે.

ટેકનોલોજી સિવાય હ્યુમેનિટીઝ અને સાયન્સમાં પણ ભારતે કાઠું કાઢ્યું છે. જવાહરલાલ નહેરુ યુનિવર્સિટી અને BITS પિલાની જેવી સંસ્થાઓએ પણ પોતપોતાના વિષયોમાં વિશ્વની શ્રેષ્ઠ 50 સંસ્થાઓમાં એન્ટ્રી કરીને સૌને ચોંકાવી દીધા છે. શિક્ષણ નિષ્ણાતોના મતે, આ સફળતા પાછળ સંશોધન અને ઉદ્યોગો સાથેના જોડાણમાં થયેલો વધારો મુખ્ય કારણ છે. જે રીતે ભારતીય સંસ્થાઓ દર વર્ષે રેન્કિંગમાં ઉપર જઈ રહી છે, તે જોતા ભવિષ્યમાં ભારત 'વિશ્વગુરુ' બનવાની દિશામાં મક્કમ ડગલાં ભરી રહ્યું હોય તેમ જણાય છે. આ રેન્કિંગથી હવે વિદેશી વિદ્યાર્થીઓ માટે પણ ભારત અભ્યાસનું મનપસંદ સ્થળ બનશે.