લખન: ઉત્તર પ્રદેશની યોગી સરકારે રામ નવમીના પવિત્ર પર્વ નિમિત્તે રાજ્યના લાખો કર્મચારીઓ અને વિદ્યાર્થીઓ માટે એક ખુશીના સમાચાર જાહેર કર્યા છે. રામ જન્મોત્સવની ઉજવણીમાં કોઈ ખલેલ ન પહોંચે તે હેતુથી સરકારે ૨૬ માર્ચની સાથે હવે ૨૭ માર્ચ, ૨૦૨૬ના રોજ પણ જાહેર રજા જાહેર કરી દીધી છે. આ નિર્ણયને પગલે હવે ઉત્તર પ્રદેશમાં સતત બે દિવસ સુધી સરકારી કચેરીઓ, શાળાઓ અને કોલેજો બંધ રહેશે, જેથી શ્રદ્ધાળુઓ ભક્તિભાવ પૂર્વક નવરાત્રી અને રામ નવમીની ઉજવણી કરી શકશે.
કેમ લેવો પડ્યો બે દિવસની રજાનો નિર્ણય?
હિન્દુ પંચાંગ મુજબ, આ વર્ષે રામ નવમીની ચોક્કસ તારીખને લઈને જ્યોતિષીઓમાં મતાંતર જોવા મળ્યા હતા. કેટલાક વિદ્વાનો ૨૬ માર્ચને શ્રેષ્ઠ માનતા હતા, જ્યારે અન્ય મંતવ્યો મુજબ મહાનવમી ૨૭ માર્ચે ઉજવવી શાસ્ત્રોક્ત જણાતી હતી. આ મૂંઝવણને કારણે જનતા અને ધાર્મિક સંગઠનોમાં અસમંજસ હતી. અલ્હાબાદ હાઈકોર્ટે પણ અગાઉ ૨૬ને બદલે ૨૭ માર્ચે રજા જાહેર કરી હતી, જેને ધ્યાનમાં રાખીને યોગી સરકારે બંને દિવસોને રજા તરીકે માન્યતા આપી દીધી છે.
સચિવાલય સંઘની માંગનો સ્વીકાર
ઉત્તર પ્રદેશ સચિવાલયના વિવિધ સંગઠનો અને કર્મચારી યુનિયનો દ્વારા મુખ્યમંત્રીને પત્ર લખીને રજૂઆત કરવામાં આવી હતી કે, નવરાત્રી અને રામ નવમી હિન્દુ ધર્મના અત્યંત મહત્વના પર્વો છે. ભક્તોની આસ્થા અને ધાર્મિક ગણતરીઓને પ્રાથમિકતા આપતા સૌરભ સિંહ અને સંજીવ કુમાર સિંહા જેવા અગ્રણીઓએ ૨૭મીએ પણ રજા આપવા વિનંતી કરી હતી. મુખ્યમંત્રી યોગી આદિત્યનાથે આ જનભાવનાને માન આપી તાત્કાલિક અસરથી ૨૭ માર્ચને પણ રજાના લિસ્ટમાં ઉમેરી દીધી છે.
ભક્તિ અને શ્રદ્ધાનો બેવડો ઉત્સવ
અયોધ્યામાં રામલલ્લાના ભવ્ય મંદિરના નિર્માણ બાદ આ પ્રથમ એવી રામ નવમી છે જ્યારે ઉત્સાહ બમણો છે. આ નિર્ણયથી લાખો શ્રદ્ધાળુઓ અયોધ્યા સહિત રાજ્યના વિવિધ ધાર્મિક સ્થળોએ જઈને પૂજા-અર્ચના કરી શકશે. સરકારના આ નિર્ણયને સોશિયલ મીડિયા પર અને સામાન્ય જનતામાં વ્યાપક આવકાર મળી રહ્યો છે. હવે યુપીમાં ૨૬ અને ૨૭ માર્ચ એમ બે દિવસ 'જય શ્રી રામ'ના નાદ સાથે રજાનો આનંદ માણી શકાશે.