લખનૌ: ઉત્તર પ્રદેશના રાજકારણમાં આગામી ૨૦૨૭ની વિધાનસભા ચૂંટણીના પડઘમ અત્યારથી જ સંભળાવવા લાગ્યા છે. સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે બુધવારે એક અત્યંત ચોંકાવનારો અને વ્યૂહાત્મક નિર્ણય લેતા 'બેન્ડિટ ક્વીન' તરીકે જાણીતા પૂર્વ સાંસદ સ્વ. ફૂલન દેવીની મોટી બહેન રૂકમણી નિષાદને સપા મહિલા સભાના પ્રદેશ પ્રમુખ તરીકે નિયુક્ત કર્યા છે. આ નિમણૂક સાથે અખિલેશે સ્પષ્ટ સંકેત આપ્યો છે કે તેઓ પોતાના 'PDA' (પછાત, દલિત, અલ્પસંખ્યક) ફોર્મ્યુલાને જમીની સ્તર પર મજબૂત કરવા માંગે છે.
નિષાદ મતદારો પર સીધું નિશાન
ઉત્તર પ્રદેશની અનેક બેઠકો પર નિષાદ સમુદાયના મતો નિર્ણાયક સાબિત થાય છે. અત્યાર સુધી ભાજપ અને તેના સાથી પક્ષ 'નિષાદ પાર્ટી' આ મતો પર પોતાનો કબજો હોવાનો દાવો કરતા હતા. જોકે, ફૂલન દેવીના પરિવારમાંથી જ રૂકમણી નિષાદને મોટી જવાબદારી સોંપીને અખિલેશ યાદવે સીધું જ નિષાદ મતદારોના હૃદયમાં સ્થાન બનાવવાનો પ્રયાસ કર્યો છે. રાજકીય નિષ્ણાતો માને છે કે રૂકમણી દેવીના આવવાથી સપાને મહિલાઓ અને પછાત વર્ગોમાં નવી ઉર્જા મળશે.
કોણ છે રૂકમણી નિષાદ?
જાલૌન જિલ્લાના શેખપુર ગુઢા ગામના વતની રૂકમણી નિષાદ લાંબા સમયથી સામાજિક કાર્યોમાં સક્રિય છે. ફૂલન દેવીની બહેન હોવાને કારણે નિષાદ સમુદાયમાં તેમનો ઘણો આદર છે. તાજેતરમાં જ તેઓ વિધિવત રીતે સમાજવાદી પાર્ટીમાં જોડાયા હતા. તેમની નિમણૂકના સમાચાર વહેતા થતા જ સોશિયલ મીડિયા પર સપા સમર્થકોએ તેમને અભિનંદન પાઠવ્યા હતા અને તેને ઉત્તર પ્રદેશના રાજકારણનું 'ટર્નિંગ પોઈન્ટ' ગણાવ્યું હતું.
ભાજપ અને સાથી પક્ષો માટે પડકાર
નિષાદ પાર્ટીએ તાજેતરમાં જ ગોરખપુરમાં ભવ્ય બાઇક રેલી યોજીને પોતાની તાકાત બતાવી હતી અને અનામતની માંગણી દોહરાવી હતી. તેની સામે વળતો પ્રહાર કરતા સપાએ રૂકમણી નિષાદને મેદાનમાં ઉતાર્યા છે. રૂકમણી દેવી હવે રાજ્યભરમાં ભ્રમણ કરીને મહિલા કાર્યકરોને સક્રિય કરશે અને મહિલા સુરક્ષા તથા સશક્તિકરણના મુદ્દાઓ ઉઠાવશે.
અખિલેશ યાદવની આ વ્યૂહરચના ૨૦૨૭ની ચૂંટણીમાં કેટલી સફળ રહે છે, તે તો સમય જ બતાવશે, પરંતુ હાલમાં તો આ નિમણૂકે યુપીના રાજકીય તાપમાનમાં વધારો કરી દીધો છે.