નવી દિલ્હી: કેન્દ્ર સરકારના લાખો કર્મચારીઓ અને પેન્શનરો જેની આતુરતાથી રાહ જોઈ રહ્યા હતા, તે ૮મા પગાર પંચ (8th Pay Commission) ને લઈને અત્યંત મહત્વના અપડેટ સામે આવ્યા છે. નાણા મંત્રાલયે સંસદમાં સ્પષ્ટતા કરી છે કે ૮મા પગાર પંચે હવે ઔપચારિક રીતે પોતાનું કામ શરૂ કરી દીધું છે. આ પંચની ભલામણો બાદ સરકારી કર્મચારીઓના પગાર માળખા, ભથ્થા અને પેન્શન સિસ્ટમમાં ઐતિહાસિક ફેરફારો થવાની પૂરેપૂરી શક્યતા છે.
કોણ સંભાળી રહ્યું છે કમિશનની કમાન?
સરકારે માહિતી આપી છે કે ૩ નવેમ્બર, ૨૦૨૫ના રોજ જારી કરાયેલા જાહેરનામા મુજબ, સુપ્રીમ કોર્ટના ભૂતપૂર્વ જસ્ટિસ રંજના પ્રકાશ દેસાઈને આ પંચના અધ્યક્ષ તરીકે નિયુક્ત કરવામાં આવ્યા છે. આ ટીમમાં પુલક ઘોષ અને પંકજ જૈન જેવા નિષ્ણાતોનો પણ સમાવેશ થાય છે. આ કમિશનનું મુખ્ય કાર્ય વર્તમાન આર્થિક સ્થિતિને ધ્યાનમાં રાખીને કર્મચારીઓના વેતન અને સુવિધાઓની સમીક્ષા કરવાનું છે.
ક્યારે લાગુ થશે નવો પગાર?
નાણા મંત્રાલયના જણાવ્યા મુજબ, કમિશનને તેની સ્થાપનાથી અંદાજે ૧૮ મહિનાનો સમય રિપોર્ટ તૈયાર કરવા માટે આપવામાં આવ્યો છે. આનો અર્થ એ થયો કે ૨૦૨૭ના મધ્ય સુધીમાં પંચ પોતાની અંતિમ ભલામણો સરકારને સોંપશે. જોકે, આ ભલામણોનો અમલ ક્યારથી કરવો અને તેનાથી સરકારી તિજોરી પર કેટલો બોજ પડશે, તેનો આખરી નિર્ણય કેન્દ્ર સરકાર દ્વારા લેવામાં આવશે.
કર્મચારીઓ પાસે માંગવામાં આવ્યા સૂચનો
આ વખતે પગાર પંચની પ્રક્રિયામાં પારદર્શિતા લાવવા માટે સરકારે કર્મચારીઓ અને પેન્શનરો પાસેથી સીધા સૂચનો મંગાવ્યા છે. આ માટે એક સ્પેશિયલ ઓનલાઇન પોર્ટલ પણ શરૂ કરવામાં આવ્યું છે. કર્મચારીઓ 'MyGov' પોર્ટલ પર ઉપલબ્ધ ૧૮ પ્રશ્નોની પ્રશ્નાવલીના જવાબ ૩૧ માર્ચ, ૨૦૨૬ સુધી આપી શકશે. આ ઉપરાંત, વિવિધ કર્મચારી સંગઠનો પોતાના મેમોરેન્ડમ ૩૦ એપ્રિલ, ૨૦૨૬ સુધી સબમિટ કરી શકશે.
મોંઘવારીના જમાનામાં પગાર વધારાની આશા રાખતા લાખો પરિવારો માટે આ સમાચાર આશાનું નવું કિરણ લઈને આવ્યા છે. આગામી દિવસોમાં કમિશન દ્વારા લેવામાં આવનારા નિર્ણયો પર દેશભરના સરકારી કર્મચારીઓની નજર ટકેલી છે.