રાજકોટ: ભારતીય રેલવેના માળખાગત વિકાસને નવી ઊંચાઈએ લઈ જવા માટે કેન્દ્ર સરકાર એક અત્યંત મહત્વકાંક્ષી યોજના પર કામ કરી રહી છે. રેલવે ક્ષેત્રની બે દિગ્ગજ પબ્લિક સેક્ટર અન્ડરટેકિંગ (PSU) કંપનીઓ — રેલ વિકાસ નિગમ લિમિટેડ (RVNL) અને ઇરકોન ઇન્ટરનેશનલ (Ircon) ના મર્જરની તૈયારીઓ તેજ કરી દેવામાં આવી છે. આ વિલયનો મુખ્ય ઉદ્દેશ્ય એક એવી વિશાળ સરકારી સંસ્થા બનાવવાનો છે જે ભારત જ નહીં પરંતુ વિદેશમાં પણ મોટા અને જટિલ ઇન્ફ્રાસ્ટ્રક્ચર પ્રોજેક્ટ્સ માટે મજબૂત દાવેદારી કરી શકે.
શેરબજારમાં તેજીનો માહોલ
આ મર્જરના સમાચાર વાયુવેગે ફેલાતા જ શેરબજારમાં બંને કંપનીઓના શેરમાં ઉછાળો જોવા મળ્યો છે. મંગળવારે ઇરકોનના શેર ૨.૯% વધીને ₹૧૧૯ પર પહોંચ્યા હતા, જ્યારે RVNL ના શેર ₹૨૫૮ ના સ્તરે બંધ થયા હતા. બજારના નિષ્ણાતો માને છે કે આ મર્જરથી બંને કંપનીઓની સંયુક્ત શક્તિ વધશે, જે લાંબા ગાળે રોકાણકારો માટે ફાયદાકારક સાબિત થઈ શકે છે.
₹૧.૫ લાખ કરોડની વિશાળ ઓર્ડર બુક
મર્જર બાદ અસ્તિત્વમાં આવનારી નવી કંપનીની સંયુક્ત ઓર્ડર બુક ₹૧.૫ લાખ કરોડથી પણ વધુ હોવાનો અંદાજ છે. હાલમાં RVNL નું માર્કેટ કેપ આશરે ₹૫૩,૮૭૭ કરોડ અને ઇરકોનનું ₹૧૧,૧૫૯ કરોડ છે. બંને કંપનીઓ અત્યાર સુધી સમાન પ્રકારના પ્રોજેક્ટ્સ માટે એકબીજા સાથે સ્પર્ધા કરતી હતી, પરંતુ હવે મર્જર બાદ તેઓ સંયુક્ત માનવશક્તિ, તકનીકી ક્ષમતા અને નાણાકીય તાકાત સાથે મોટા ઇન્ફ્રાસ્ટ્રક્ચર પ્લેયર્સને માત આપી શકશે.
બીજી તરફ સેન્સેક્સના દિગ્ગજોને 'ઝટકો'
એક તરફ રેલવે શેરોમાં ઉત્સાહ છે, ત્યારે બીજી તરફ શેરબજારમાં સેન્સેક્સની ટોચની ૧૦ કંપનીઓમાંથી ૫ કંપનીઓના માર્કેટ કેપમાં ગયા અઠવાડિયે ₹૧.૦૨ લાખ કરોડનું જંગી ધોવાણ થયું છે. આ ઘટાડામાં સૌથી વધુ નુકસાન HDFC બેંકને થયું છે. ગત સપ્તાહે BSE સેન્સેક્સ અને NSE નિફ્ટી બંનેમાં મામૂલી ઘટાડો નોંધાયો હતો, જેના કારણે રોકાણકારોમાં ચિંતાનો માહોલ જોવા મળ્યો હતો.
આગળની પ્રક્રિયા
જોકે, RVNL અને ઇરકોનનું મર્જર રાતોરાત નહીં થાય. આ માટે વિવિધ સરકારી વિભાગો અને અંતે કેન્દ્રીય કેબિનેટની મંજૂરી મેળવવી પડશે. રેલવે મંત્રાલય આગામી દિવસોમાં આ માટેનો વિગતવાર બ્લુપ્રિન્ટ તૈયાર કરશે. PFC અને REC ના મર્જર બાદ આ સરકારનું બીજું મોટું વિલય પગલું છે, જે દર્શાવે છે કે સરકાર હવે મજબૂત સરકારી સંસ્થાઓ બનાવવા પર ભાર મૂકી રહી છે.