રાજકોટ: વિશ્વ અત્યારે ત્રીજા વિશ્વયુદ્ધના ઉંબરે આવીને ઊભું હોય તેવા સંકેતો પશ્ચિમ એશિયામાંથી મળી રહ્યા છે. ઈરાનના સરકારી ટેલિવિઝને બુધવારે એક અત્યંત ચોંકાવનારો દાવો કર્યો છે કે, તેમની સેનાએ અમેરિકાના શક્તિશાળી વિમાનવાહક જહાજ 'USS અબ્રાહમ લિંકન' ને નિશાન બનાવીને ક્રુઝ મિસાઈલો છોડી છે. ઈરાનની 'ફાર્સ ન્યૂઝ એજન્સી' દ્વારા જાહેર કરવામાં આવેલા એક વીડિયોમાં આકાશમાં મિસાઈલો છૂટતી અને પ્રચંડ વિસ્ફોટોના અવાજો સંભળાઈ રહ્યા છે, જેનાથી સમગ્ર આંતરરાષ્ટ્રીય સમુદાયમાં ખળભળાટ મચી ગયો છે.
સીધી ચેતવણી અને હુમલો
આ હુમલા અગાઉ ઈરાની નૌકાદળના કમાન્ડર રીઅર એડમિરલ શાહરામ ઈરાનીએ અમેરિકાને ખુલ્લી ચેતવણી આપી હતી. તેમણે સ્પષ્ટ શબ્દોમાં કહ્યું હતું કે, USS અબ્રાહમ લિંકન ઈરાની મિસાઈલ સિસ્ટમની રેન્જમાં છે અને તેની હિલચાલ પર સતત નજર રાખવામાં આવી રહી છે. જો આ જહાજ ઈરાની જળસીમાની નજીક આવવાનો પ્રયાસ કરશે, તો તેને આર્મી નેવી દ્વારા નિશાન બનાવવામાં આવશે. આ ચેતવણીના ગણતરીના કલાકોમાં જ મિસાઈલ છોડ્યાના અહેવાલો સામે આવ્યા છે.
ટ્રમ્પના દાવાઓ અને વાસ્તવિકતા
એક તરફ અમેરિકી રાષ્ટ્રપતિ ડોનાલ્ડ ટ્રમ્પ સતત એવા દાવા કરી રહ્યા છે કે તેઓ વાટાઘાટો દ્વારા પશ્ચિમ એશિયામાં શાંતિ સ્થાપિત કરવાના પ્રયાસો કરી રહ્યા છે, ત્યારે બીજી તરફ ઈરાનનું આ આક્રમક વલણ કંઈક અલગ જ વાર્તા કહી રહ્યું છે. જો આ હુમલાની પુષ્ટિ થાય છે, તો આ ચાલુ યુદ્ધમાં પ્રથમ વખત હશે જ્યારે કોઈ દેશે સીધું જ અમેરિકી એરક્રાફ્ટ કેરિયરને નિશાન બનાવવાની હિંમત કરી હોય.
અમેરિકાનું મૌન અને સ્થિતિ
હાલમાં અમેરિકી સંરક્ષણ વિભાગ (પેન્ટાગોન) ના અધિકારીઓએ આ મિસાઈલ હુમલાના દાવાની સત્તાવાર પુષ્ટિ કરી નથી. પરંતુ જો ખરેખર USS અબ્રાહમ લિંકન પર હુમલો થયો હોય, તો અમેરિકા તરફથી વળતો પ્રહાર અત્યંત ભયાનક હોઈ શકે છે. ઈરાની નૌકાદળનો દાવો છે કે તેઓ યુએસ જહાજની દરેક સેકન્ડની હિલચાલ પર બાજ નજર રાખી રહ્યા છે.
પશ્ચિમ એશિયામાં વધી રહેલા આ તણાવને કારણે ક્રૂડ ઓઈલના ભાવ અને વૈશ્વિક અર્થતંત્ર પર પણ જોખમ મંડરાઈ રહ્યું છે. હવે આખી દુનિયાની નજર અમેરિકાના સત્તાવાર નિવેદન પર ટકેલી છે.