આંતરરાષ્ટ્રીય આર્થિક મેગેઝિનોના અહેવાલોમાં આઈપીએલની સરખામણી અમેરિકાની નેશનલ ફૂટબોલ લીગ (એનએફએલ), નેશનલ બાસ્કેટબોલ એસોસિએશન (એનબીએ) અને બ્રિટનની ઇંગ્લિશ પ્રીમિયર લીગ (ઈપીએલ) સાથે કરવામાં આવી રહી છે. ભલે આઈપીએલ વર્ષમાં માત્ર બે કે અઢી મહિના જ રમાતી હોય, પરંતુ મેચ દીઠ આવક અને મીડિયા રાઇટ્સના મૂલ્યની દ્રષ્ટિએ તે વિશ્વની ટોચની લીગની હરોળમાં સ્થાન પામી ચૂકી છે. 

ઉપલબ્ધ ડેટા મુજબ, એનએફએલ કે ઈપીએલની ટીમો દાયકાઓ જૂની હોવા છતાં, આઈપીએલ ટીમોએ માત્ર દોઢ દાયકાના ટૂંકા ગાળામાં જ અબજો ડોલરનું મૂલ્ય હાંસલ કરી લીધું છે. આ જંગી આર્થિક કદ અને બેશુમાર લોકપ્રિયતા દર્શાવે છે કે ભારત હવે વૈશ્વિક રમતગમત અર્થતંત્રમાં એક પાવરહાઉસ તરીકે ઉભરી ચૂક્યું છે.*