:નવી દિલ્હી : ભારત સરકારે દેશની સુરક્ષા અને પ્રવાસન સુવિધાને એક નવા સ્તરે લઈ જવાનો નિર્ણય કર્યો છે. IVFRT 3.0 ના આગામી તબક્કામાં નવી અને ઉભરતી ટેક્નોલોજીનો વ્યાપક ઉપયોગ કરવામાં આવશે. સરકારનો લક્ષ્ય છે કે વિદેશી પ્રવાસીઓ માટે વિઝાથી લઈને રજીસ્ટ્રેશન સુધીની તમામ પ્રક્રિયા સંપૂર્ણપણે 'કોન્ટેક્ટલેસ' અને 'પેપરલેસ' બને. નવા બજેટ હેઠળ એરપોર્ટ પર એવા સ્માર્ટ ઈન્ફ્રાસ્ટ્રક્ચર ઉભા કરવામાં આવશે, જેનાથી પ્રવાસીઓને લાંબી કતારોમાં ઉભા રહેવાની જરૂર નહીં પડે અને સમગ્ર ઇમિગ્રેશન સિસ્ટમ વિશ્વસ્તરીય બનશે. આ યોજના 1 એપ્રિલ, 2026 થી 31 માર્ચ, 2031 સુધી અમલમાં રહેશે.

30 સેકન્ડમાં ક્લિયરન્સ અને 91% ઇ-વિઝાની મંજૂરી

છેલ્લા કેટલાક વર્ષોમાં આ યોજનાએ જે પરિણામો આપ્યા છે તે આશ્ચર્યજનક છે. અત્યાર સુધીમાં 91% થી વધુ ઇ-વિઝા અરજીઓ માત્ર 72 કલાકમાં મંજૂર કરવામાં આવી છે. એરપોર્ટ પર જે ઇમિગ્રેશન ક્લિયરન્સમાં પહેલા કલાકો લાગતા હતા, તે સમય હવે ઘટાડીને સરેરાશ 2.5 થી 3 મિનિટ કરવામાં આવ્યો છે. સૌથી મહત્વની વાત એ છે કે 'ફાસ્ટ-ટ્રેક ઇ-ગેટ્સ' દ્વારા આ પ્રક્રિયા હવે માત્ર 30 સેકન્ડમાં પૂર્ણ કરી શકાય છે. આગામી પાંચ વર્ષમાં આ સુવિધાને વધુ વિસ્તૃત કરવામાં આવશે, જેનાથી વિદેશી વેપારીઓ અને પ્રવાસીઓ માટે ભારત આવવું વધુ સરળ અને ગતિશીલ બનશે.

સુરક્ષા અને રોજગારીનો સમન્વય

IVFRT યોજના માત્ર સુવિધા પૂરતી મર્યાદિત નથી, પરંતુ તે રાષ્ટ્રીય સુરક્ષા માટે પણ અત્યંત મહત્વની છે. આ ડિજિટલ પ્લેટફોર્મ દ્વારા વિદેશી પ્રવાસીઓનું સચોટ ટ્રેકિંગ થઈ શકશે, જે સુરક્ષા એજન્સીઓને કોઈપણ શંકાસ્પદ હિલચાલ રોકવામાં મદદરૂપ થશે. સરકાર માને છે કે આ આધુનિકીકરણથી પ્રવાસન, ઉડ્ડયન અને આતિથ્ય (Hospitality) ક્ષેત્રમાં તેજી આવશે, પરિણામે લાખો નવી રોજગારીની તકો ઉભી થશે. સ્વ-સેવા કિઓસ્ક અને મોબાઇલ-આધારિત સેવાઓના પ્રોત્સાહન સાથે, ભારત હવે વૈશ્વિક મંચ પર એક હાઇટેક ઇમિગ્રેશન હબ તરીકે ઉભરી આવશે.