નવી દિલ્હી, તા.26: યુનાઇટેડ સ્ટેટ્સ (US) જવા માંગતા ભારતીયો અને અન્ય વિદેશી નાગરિકો માટે હવે મુશ્કેલી વધી શકે છે. અમેરિકી સ્ટેટ ડિપાર્ટમેન્ટે જાહેરાત કરી છે કે 30 માર્ચથી વિઝા સ્ક્રીનીંગ પ્રક્રિયાને વધુ કડક બનાવવામાં આવશે. હવે માત્ર તમારા ડોક્યુમેન્ટ્સ જ નહીં, પરંતુ તમારી સોશિયલ મીડિયા એક્ટિવિટી પણ તપાસવામાં આવશે. જો તમે કોઈ વિવાદાસ્પદ પોસ્ટ કરી હશે અથવા તમારી ઓનલાઇન હાજરી શંકાસ્પદ જણાશે, તો વિઝા રિજેક્ટ થઈ શકે છે.
કયા વિઝા પર પડશે અસર?
અગાઉ વિદ્યાર્થી વિઝા (F, M, J) અને H-1B વિઝા માટે આ નિયમો અમલમાં હતા જ, પરંતુ હવે તેનો વિસ્તાર કરીને નીચે મુજબની શ્રેણીઓને પણ આવરી લેવામાં આવી છે:
•    H-3 અને H-4 (તાલીમાર્થીઓ અને આશ્રિતો)
•    K વિઝા (મંગેતર વિઝા)
•    T અને U વિઝા (માનવીય વિઝા)
•    A-3, C-3, G-5 (ઘરેલું કામદારો અને અન્ય વિશિષ્ટ શ્રેણીઓ)
•    R અને S વિઝા (ધાર્મિક અને ખાસ સાક્ષીઓ)
તમારે શું કરવું પડશે?
નવા નિયમ મુજબ, અરજદારોએ તેમના તમામ સોશિયલ મીડિયા હેન્ડલ્સની વિગતો ફોર્મમાં આપવી પડશે. એટલું જ નહીં, તપાસ દરમિયાન પ્રોફાઇલને "જાહેર" (Public) રાખવી પડશે જેથી અધિકારીઓ તમારી પાછલી ગતિવિધિઓ, શેર કરેલી સામગ્રી અને તમારા વિચારોની સમીક્ષા કરી શકે. આ પ્રક્રિયાને કારણે વિઝા પ્રોસેસિંગના સમયમાં પણ વધારો થવાની શક્યતા છે.
શા માટે લેવાયો આ નિર્ણય?
અમેરિકી સુરક્ષા એજન્સીઓનું માનવું છે કે સોશિયલ મીડિયા દ્વારા વ્યક્તિના વિચાર અને તેની સંભવિત જોખમી પ્રવૃત્તિઓ વિશે વધુ સારી જાણકારી મળી શકે છે. ખોટી માહિતી ફેલાવનારા, વ્યસન કે હિંસાને પ્રોત્સાહન આપનારા લોકો પર રોક લગાવવા માટે આ 'ડિજિટલ પૃષ્ઠભૂમિ તપાસ' અનિવાર્ય બનાવવામાં આવી છે.
જો તમે પણ આગામી સમયમાં અમેરિકાના વિઝા માટે અરજી કરવાનું વિચારી રહ્યા હોવ, તો તમારી સોશિયલ મીડિયા પ્રોફાઇલને એકવાર 'ક્લીન' કરી લેવી હિતાવહ રહેશે.