નવી દિલ્હી, તા.26: ઈરાન અને ઈઝરાયલ વચ્ચે વધી રહેલા યુદ્ધના તણાવને કારણે પશ્ચિમ એશિયાનું આકાશ અત્યારે અશાંત છે. કુવૈત અને બહેરીન જેવા દેશોએ પોતાનું હવાઈ ક્ષેત્ર (Airspace) બંધ કરી દેતા હજારો ભારતીયો મુશ્કેલીમાં મુકાયા હતા. જોકે, ભારત સરકારે સમયસૂચકતા વાપરીને પોતાના નાગરિકોને વતન પરત લાવવા માટે વૈકલ્પિક અને સુરક્ષિત માર્ગો શોધી કાઢ્યા છે. વિદેશ મંત્રાલય (MEA) દ્વારા 'એક્ટિવ મોડ'માં રેસ્ક્યુ ઓપરેશન ચલાવવામાં આવી રહ્યું છે.
સાઉદી અને ઓમાનના માર્ગે વિમાનોની ઉડાન
વિદેશ મંત્રાલયના અધિક સચિવ અસીમ આર. મહાજને માહિતી આપી હતી કે કુવૈત અને બહેરીનનું એરસ્પેસ બંધ હોવા છતાં, ભારતીયોને સાઉદી અરેબિયાના 'અલ કૈસુમા' એરપોર્ટ પર લાવવામાં આવી રહ્યા છે અને ત્યાંથી વિશેષ કોમર્શિયલ ફ્લાઇટ્સ દ્વારા ભારત પહોંચાડવામાં આવી રહ્યા છે. ઓમાન અને સાઉદી અરેબિયાથી ભારતની સીધી ફ્લાઇટ્સ હજુ પણ કાર્યરત છે, જે મુસાફરો માટે મોટી રાહત સમાન છે.
ઈરાન અને ઈઝરાયલથી આ રીતે થઈ રહ્યું છે સ્થળાંતર
યુદ્ધના મુખ્ય કેન્દ્રો ગણાતા દેશોમાંથી ભારતીયોને બહાર કાઢવા માટે સરકારે વિશેષ રણનીતિ અપનાવી છે:
•    ઈરાન: અહીંથી અત્યાર સુધીમાં 717 વિદ્યાર્થીઓ સહિત કુલ 1,043 ભારતીયોને આર્મેનિયા અને અઝરબૈજાનના રસ્તે સુરક્ષિત રીતે બહાર કાઢવામાં આવ્યા છે.
•    ઈઝરાયલ: ઇઝરાયલમાં ફસાયેલા ભારતીયોને જોર્ડન સરહદ મારફતે ભારત લાવવાની વ્યવસ્થા કરવામાં આવી રહી છે.
•    કતાર: કતારનું હવાઈ ક્ષેત્ર આંશિક રીતે ખુલ્લું હોવાથી ત્યાંથી લગભગ 9 વિશેષ ફ્લાઇટ્સ ઓપરેટ કરવાની તૈયારી છે.
સરકારની સતત દેખરેખ
ભારતીય મિશન આ તમામ દેશોમાં સ્થાનિક સત્તાવાળાઓ સાથે સતત સંપર્કમાં છે. કુવૈત, બહેરીન અને ઇરાકમાં ફ્લાઇટ પ્રતિબંધો હોવા છતાં, સાઉદી અરેબિયા એક મહત્વના 'ટ્રાન્ઝિટ હબ' તરીકે ઉભરી આવ્યું છે. સરકારે નાગરિકોને ધીરજ રાખવા અને એમ્બેસીની સૂચનાઓનું પાલન કરવા વિનંતી કરી છે. યુદ્ધની આ કપરી સ્થિતિમાં ભારતીય નાગરિકોની સુરક્ષા એ સરકારની સર્વોચ્ચ પ્રાથમિકતા છે.