ભુવનેશ્વર, તા.26: ઓડિશાના ભુવનેશ્વર ખાતે રમાઈ રહેલી નેશનલ ઇન્ડોર એથ્લેટિક્સ ચેમ્પિયનશિપ ૨૦૨૬ના અંતિમ દિવસે પંજાબના તેજતર્રાર દોડવીર ગુરિન્દરવીર સિંઘે મેદાન મારી લીધું છે. પુરુષોની 60 મીટર દોડમાં ગુરિન્દરવીરે માત્ર 6.60 સેકન્ડમાં અંતર કાપીને નવો રાષ્ટ્રીય રેકોર્ડ સ્થાપ્યો છે. આ અદ્ભુત સિદ્ધિ સાથે તેમણે ગોલ્ડ મેડલ પોતાના નામે કર્યો છે.

૮ વર્ષ જૂના રેકોર્ડનો થયો અંત

રિલાયન્સ ફાઉન્ડેશનનું પ્રતિનિધિત્વ કરી રહેલા ૨૫ વર્ષીય ગુરિન્દરવીરે વર્ષ ૨૦૧૮ થી તમિલનાડુના એલ્કિયા દાસનના નામે રહેલો 6.67 સેકન્ડનો રેકોર્ડ તોડી નાખ્યો છે. 6.60 સેકન્ડનો આ સમય હવે ભારતીય ઇન્ડોર એથ્લેટિક્સના ઈતિહાસમાં સુવર્ણ અક્ષરે લખાશે.

ફાઈનલમાં જોવા મળ્યું હાઈ-વોલ્ટેજ ડ્રામા

આ સ્પર્ધાની ફાઈનલ રેસ અત્યંત નાટકીય રહી હતી. સ્થાનિક ફેવરિટ અને ૧૦૦-૨૦૦ મીટર આઉટડોર રેકોર્ડ ધરાવનાર અનિમેષ કુજુરને ત્રણ વખત 'ફોલ્સ સ્ટાર્ટ' (ખોટી શરૂઆત) કરવા બદલ રેડ કાર્ડ આપીને ગેરલાયક ઠેરવવામાં આવ્યા હતા. આ ઘટનાએ સ્ટેડિયમમાં બેઠેલા દર્શકોને પણ ચોંકાવી દીધા હતા.

અન્ય વિજેતાઓ

ઓડિશાના લાલુ પ્રસાદ ભોઈએ 6.65 સેકન્ડ સાથે બીજું સ્થાન મેળવી સિલ્વર મેડલ જીત્યો, જ્યારે હરિયાણાના નુઝરત 6.71 સેકન્ડ સાથે ત્રીજા સ્થાને રહ્યા હતા. આ સાથે જ, પોલ વોલ્ટ સ્પર્ધામાં તમિલનાડુના ૨૪ વર્ષીય સી. રીગનએ 5.30 મીટરના નવા રાષ્ટ્રીય ઇન્ડોર રેકોર્ડ સાથે સુવર્ણ ચંદ્રક જીતીને સૌનું ધ્યાન ખેંચ્યું હતું.

બે દિવસીય આ ચેમ્પિયનશિપ ગુરિન્દરવીરની આ ઐતિહાસિક દોડ સાથે ભવ્ય રીતે સંપન્ન થઈ છે.