મુંબઈ : કોર્પોરેટ જગતના દિગ્ગજ ગણાતા અનિલ અંબાણીની મુસીબતો ઓછી થવાનું નામ નથી લઈ રહી. સ્ટેટ બેંક ઓફ ઈન્ડિયા (SBI) સાથે થયેલી ₹૧૧૪.૯૮ કરોડની છેતરપિંડીના કેસમાં સીબીઆઈએ રિલાયન્સ ટેલિકોમ લિમિટેડ અને તેના પૂર્વ ઉચ્ચ અધિકારીઓ વિરુદ્ધ સકંજો કસ્યો છે. ગુરુવારે સીબીઆઈની ટીમોએ મુંબઈ સ્થિત કંપનીની ઓફિસો અને પૂર્વ ડિરેક્ટરો સતીશ સેઠ તથા ગૌતમ બી. દોશીના નિવાસસ્થાનો પર એકસાથે દરોડા પાડ્યા હતા. આ કાર્યવાહી બાદ એજન્સીએ ભારતીય દંડ સંહિતાની વિવિધ કલમો હેઠળ છેતરપિંડી, ગુનાહિત કાવતરું અને ભ્રષ્ટાચાર નિવારણ અધિનિયમ મુજબ એફઆઈઆર (FIR) નોંધીને તપાસ તેજ બનાવી છે.

તપાસ એજન્સીના સૂત્રોના જણાવ્યા અનુસાર, SBI ૧૧ બેંકોના એવા જૂથ (Consortium) નો ભાગ હતી જેણે રિલાયન્સ ટેલિકોમને કુલ ₹૭૩૫ કરોડની ટર્મ લોન મંજૂર કરી હતી. આરોપ છે કે કંપનીના ડિરેક્ટરો અને અજાણ્યા સરકારી બાબુઓએ મિલીભગત કરીને લોનના નાણાંનો દુરુપયોગ કર્યો હતો અને બેંકને કરોડો રૂપિયાનું નાણાકીય નુકસાન પહોંચાડ્યું હતું. દરોડા દરમિયાન સીબીઆઈએ લોન વ્યવહારો અને નાણાકીય હેરફેરને લગતા અનેક વાંધાજનક દસ્તાવેજો અને ડિજિટલ પુરાવાઓ જપ્ત કર્યા છે, જે આગામી સમયમાં અનિલ અંબાણીના ગ્રુપ માટે કાયદાકીય ફાંસો વધુ મજબૂત કરી શકે છે.

નોંધનીય છે કે આ મહિનાની શરૂઆતમાં જ સીબીઆઈએ રિલાયન્સ કોમ્યુનિકેશન્સ સાથે જોડાયેલા અન્ય એક ₹૨,૯૨૯ કરોડના ફ્રોડ કેસમાં અનિલ અંબાણીની કલાકો સુધી પૂછપરછ કરી હતી. વારંવાર બેંક લોન ડિફોલ્ટ અને છેતરપિંડીના કેસોમાં નામ આવતા રિલાયન્સ ગ્રુપની શાખ પર મોટા સવાલો ઉભા થયા છે. હાલમાં એજન્સી એ દિશામાં તપાસ કરી રહી છે કે લોનના નાણાં ક્યાં ડાયવર્ટ કરવામાં આવ્યા હતા. આ મામલે અનિલ અંબાણીને ફરીથી પૂછપરછ માટે બોલાવવામાં આવે તેવી પ્રબળ શક્યતા છે, જેને કારણે મહારાષ્ટ્રના કોર્પોરેટ અને રાજકીય વર્તુળોમાં ભારે હલચલ મચી ગઈ છે.