મુંબઈ  : ખાનગી ક્ષેત્રની જાણીતી યસ બેંક ફરી એકવાર કાયદાકીય વિવાદોના કારણે ચર્ચામાં આવી છે. મહારાષ્ટ્ર ગુડ્સ એન્ડ સર્વિસ ટેક્સ (GST) વિભાગે બેંક પર ₹૭૯,૩૮,૦૦૦નો તોતિંગ દંડ ફટકાર્યો છે. આ દંડ મુખ્યત્વે નાણાકીય વર્ષ ૨૦૧૯-૨૦ થી ૨૦૨૧-૨૨ દરમિયાન થયેલા ટેક્સ સંબંધિત વ્યવહારોમાં ક્ષતિઓ બદલ લાદવામાં આવ્યો છે. બેંકે શેરબજારને આપેલી માહિતીમાં જણાવ્યું છે કે તેમને ૨૫ માર્ચ, ૨૦૨૬ના રોજ આ આદેશ મળ્યો છે. જોકે, બેંકે આ આદેશ સામે મક્કમ વલણ અપનાવતા જણાવ્યું છે કે તેઓ આ પેનલ્ટી નોટિસને યોગ્ય કાનૂની મંચ પર પડકારશે અને નિર્ધારિત સમયમર્યાદામાં અપીલ દાખલ કરશે.
આ સમાચારની સીધી અસર આવતીકાલે એટલે કે ૨૭ માર્ચ, ૨૦૨૬ના રોજ શેરબજારમાં જોવા મળી શકે છે. ખાસ કરીને યસ બેંકના શેરમાં રોકાણકારોની નજર રહેશે કારણ કે ૨૫ માર્ચે શેર ૨.૪૩%ના વધારા સાથે રૂ. ૧૮.૫૧ પર બંધ થયો હતો. આ ઉપરાંત, દેશની સૌથી મોટી જાહેર ક્ષેત્રની બેંક SBI (સ્ટેટ બેંક ઓફ ઈન્ડિયા) પર પણ તેની અસર પડી શકે છે, કારણ કે SBI યસ બેંકમાં ૧૦.૭૮% જેટલો નોંધપાત્ર હિસ્સો ધરાવે છે. અગાઉ ૨૦૨૫ના મધ્ય સુધીમાં SBIનો હિસ્સો ૨૩.૯૬% હતો, જે વ્યૂહાત્મક રીતે ઘટાડવામાં આવ્યો છે. આમ છતાં, યસ બેંકમાં થતી કોઈપણ નકારાત્મક હિલચાલ SBIના શેરના ભાવમાં પણ વધ-ઘટ લાવી શકે છે.

ટેકનિકલ રીતે જોઈએ તો આ દંડ સેન્ટ્રલ GST એક્ટની કલમ ૧૨૨(૧)(ii) હેઠળ લાદવામાં આવ્યો છે. બેંકિંગ ક્ષેત્રના નિષ્ણાતો માને છે કે ભલે દંડની રકમ બેંકના કુલ ટર્નઓવરની સરખામણીએ નાની હોય, પરંતુ આવી નોટિસોથી બેંકની પ્રતિષ્ઠા અને સેન્ટિમેન્ટ પર અસર પડે છે. આવતીકાલે જ્યારે બજાર ખુલશે ત્યારે જોવાનું એ રહેશે કે યસ બેંક આ દબાણ સામે ટકી રહે છે કે પછી વેચવાલીનો શિકાર બને છે. SBIના શેર પણ હાલમાં રૂ. ૧,૦૬૨.૬૦ની ઊંચાઈ પર ટ્રેડ કરી રહ્યા છે, ત્યારે રોકાણકારોએ આ સમાચારને ધ્યાનમાં રાખીને સાવચેતીપૂર્વક કામ લેવું હિતાવહ રહેશે.