એક સમયે KBCમાં જીત્યા હતા ૫૦ લાખઃ આજે કૌભાંડ કેસમાં જેલ ભેગા
પૂરગ્રસ્તો માટે રાહત ભંડોળના કથિત ગેરરીતિ સંદર્ભે પોલીસે મુખ્ય આરોપી ભૂતપૂર્વ તહસીલદાર અમિતાસિંહ તોમરની ધરપકડ કરી
શ્યોપુર,તા.૨૭: મધ્યપ્રદેશના શ્યોપુર જિલ્લામાં પૂરગ્રસ્તો માટે રાહત ભંડોળના કથિત ગેરરીતિ સંદર્ભે એક મોટી કાર્યવાહીમાં, પોલીસે મુખ્ય આરોપી ભૂતપૂર્વ તહસીલદાર અમિતા સિહ તોમરની ધરપકડ કરી છે. તોમરની ગ્વાલિયર સ્થિત તેમના નિવાસસ્થાનેથી ધરપકડ કરવામાં આવી હતી અને શ્યોપુરની કોર્ટમાં રજૂ કરવામાં આવી હતી, જ્યાંથી તેમને ન્યાયિક કસ્ટડીમાં મોકલી દેવામાં આવ્યા હતા અને પછી જેલમાં મોકલી દેવામાં આવ્યા હતા.
આ કેસ ૨૦૨૧ માં શ્યોપુર જિલ્લામાં આવેલા પૂર પછી રાહત ભંડોળના વિતરણ સાથે સંબંધિત છે. એવો આરોપ છે કે બરોડા તહસીલમાં, તત્કાલીન તહસીલદાર અમિતા સિહ તોમરે - આશરે ૨૫ પટવારી (મહેસૂલ અધિકારીઓ) અને ૧૦૦ થી વધુ મધ્યસ્થીઓ સાથે મળીને - ૧૨૭ બનાવટી બેન્ક ખાતાઓમાં લગભગ રૂ. ૨.૫૭ કરોડની રકમનું વિતરણ કરવામાં મદદ કરી હતી. તપાસમાં જાણવા મળ્યું કે રાહત ભંડોળના વિતરણ દરમિયાન, ઘણા અયોગ્ય વ્યક્તિઓ અને સંબંધીઓને પૂર પીડિતો તરીકે ખોટી રીતે ઓળખ આપીને તેમના ખાતામાં પૈસા જમા કરવામાં આવ્યા હતા, અને સાચા પીડિતોને કોઈ સહાય મળી ન હતી. ડેપ્યુટી કલેક્ટર દ્વારા હાથ ધરવામાં આવેલા ઑડિટ દરમિયાન આ અનિયમિતતા પ્રકાશમાં આવી હતી, જેના પગલે બરોડા પોલીસ સ્ટેશનમાં કેસ નોંધવામાં આવ્યો હતો.
આ કેસના સંદર્ભમાં, પોલીસે ભારતીય દંડ સંહિતા (આઈપીસી) ની કલમ ૪૨૦, ૪૬૭, ૪૬૮, ૪૦૯ અને ૧૨૦-બી, તેમજ ભ્રષ્ટાચાર નિવારણ અધિનિયમ, ૧૯૮૮ હેઠળ કેસ નોંધ્યો છે. તપાસ દરમિયાન, અમિતા સિહ તોમર અને ૨૫ પટવારી સહિત ૧૦૦ થી વધુ વ્યક્તિઓને આરોપી તરીકે નામ આપવામાં આવ્યા છે.
ધરપકડથી બચવા માટે, અમિતા સિહ તોમરે શરૂઆતમાં હાઈ કોર્ટની ગ્વાલિયર બેન્ચ સમક્ષ આગોતરા જામીન અરજી દાખલ કરી હતી, જેને પછીથી ફગાવી દેવામાં આવી હતી. આ પછી, તેમણે આગોતરા જામીન માટે સ્પેશિયલ લીવ પિટિશન (SLP) સાથે સુપ્રીમ કોર્ટમાં અરજી કરી; જોકે, ૧૭ માર્ચ, ૨૦૨૬ ના રોજ સુપ્રીમ કોર્ટે આ અરજી પણ ફગાવી દીધી હતી.
એવું જાણવા મળ્યું છે કે અમિતા સિહ તોમરને તેમની ધરપકડના એક દિવસ પહેલા જ વિજયપુરના તહસીલદાર તરીકેની ફરજોમાંથી મુક્ત કરવામાં આવ્યા હતા. ત્યારબાદ તરત જ, પોલીસે તેમની ગ્વાલિયર સ્થિત તેમના નિવાસસ્થાનેથી ધરપકડ કરી. શ્યોપુરના પોલીસ અધિક્ષક (SP) સુધીર કુમાર અગ્રવાલે ફોન પર ધરપકડની પુષ્ટિ કરતા કહ્યું કે આ કેસમાં અન્ય વ્યક્તિઓની સંડોવણીની તપાસ ચાલુ છે, અને ત્યારબાદ વધુ ધરપકડો થઈ શકે છે.
બોલિવૂડ ફિલ્મોના મહાનાયક અભિનેતા અમિતાભ બચ્ચનના લોકપ્રિય ગેમ શો ‘કૌન બનેગા કરોડપતિ'ની પાંચમી સીઝનમાં રૂ. ૫૦ લાખ જીત્યા બાદ અમિતા સિહ તોમર ૨૦૧૧ માં પ્રખ્યાત બન્યા હતા. ત્યારથી, તેઓ વારંવાર વિવાદોમાં ફસાયેલા પણ હતા. સોશિયલ મીડિયા પર કરવામાં આવેલી વિવાદાસ્પદ પોસ્ટ્સ અને ટિપ્પણીઓને કારણે તેમને અગાઉ સસ્પેન્ડ કરવામાં આવી છે. વધુમાં, તેમણે પોતાની બદલીઓ અંગે વડા પ્રધાનને પત્ર લખ્યો હતો અને ૨૦૨૩ માં, જો તેમને તહસીલનો હવાલો સોંપવામાં નહીં આવે તો રાજીનામું આપવાની ધમકી પણ આપી હતી. હાલમાં, પોલીસ આ મામલાની વિગતવાર તપાસ કરી રહી છે અને અન્ય આરોપી વ્યક્તિઓ દ્વારા ભજવવામાં આવેલી ભૂમિકાની પણ તપાસ કરી રહી છે
(10:08 AM IST)
છેલ્લા 8 દિવસમાં સૌથી લોકપ્રિય 
