નવી દિલ્હી: દેશના ઔદ્યોગિક એકમોને મોટી રાહત આપતા કેન્દ્રીય પેટ્રોલિયમ અને કુદરતી ગેસ મંત્રાલય (MoPNG) દ્વારા કોમર્શિયલ એલપીજી (LPG) ના ક્વોટામાં મહત્વનો વધારો કરવાની જાહેરાત કરવામાં આવી છે. મંત્રાલયના સચિવ ડૉ. નીરજ મિત્તલે તમામ રાજ્યો અને કેન્દ્રશાસિત પ્રદેશોના મુખ્ય સચિવોને પત્ર લખીને જાણ કરી છે કે, હાલના ૫૦% ક્વોટા ઉપરાંત વધારાના ૨૦% ફાળવણીની દરખાસ્ત કરવામાં આવી છે. આ નિર્ણય સાથે હવે કોમર્શિયલ એલપીજીની કુલ ફાળવણી પૂર્વ-સંકટના સ્તરના ૭૦% સુધી પહોંચશે, જેનાથી ઔદ્યોગિક કામગીરીને વેગ મળશે.

શ્રમ-સઘન ઉદ્યોગોને મળશે પ્રાથમિકતા:
કેન્દ્રીય સચિવે પત્રમાં સ્પષ્ટતા કરી છે કે આ વધારાની ફાળવણીમાં એવા ઉદ્યોગોને અગ્રતા આપવામાં આવશે જે શ્રમ-સઘન છે અને અન્ય આવશ્યક ક્ષેત્રોને ટેકો પૂરો પાડે છે. જેમાં મુખ્યત્વે સ્ટીલ, ઓટોમોબાઈલ, ટેક્સટાઈલ, ડાઈઝ, કેમિકલ્સ અને પ્લાસ્ટિક ઉદ્યોગોનો સમાવેશ થાય છે. આ ઉપરાંત, એવા પ્રોસેસ ઉદ્યોગો કે જેમને સ્પેશિયલાઈઝ્ડ હીટિંગ હેતુઓ માટે એલપીજીની જરૂર પડે છે અને જ્યાં કુદરતી ગેસ (Natural Gas) નો વિકલ્પ ઉપલબ્ધ નથી, તેમને ખાસ પ્રાથમિકતા આપવામાં આવશે.

રાજ્યોને રિફોર્મ-આધારિત ક્વોટાનો લાભ લેવા અનુરોધ:
નીરજ મિત્તલે તમામ રાજ્યોને ૧૦% રિફોર્મ-આધારિત ફાળવણીનો તાત્કાલિક લાભ લેવા માટે પણ આગ્રહ કર્યો છે. તેમણે જણાવ્યું હતું કે, જો રાજ્યો આ સુધારા આધારિત ક્વોટાનો અમલ કરશે, તો કોમર્શિયલ અને ઔદ્યોગિક એલપીજીની ફાળવણી વધીને કુલ ૭૦% (૧૦% રિફોર્મ સહિત) થઈ જશે. આ વધારાના પુરવઠાને કારણે રાજ્યોમાં ચાલી રહેલા ઔદ્યોગિક એકમોને ઈંધણના સંકટમાંથી મોટી રાહત મળશે અને ઉત્પાદન પ્રક્રિયા વધુ સરળ બનશે.

કેન્દ્ર સરકારના આ પગલાથી ઉદ્યોગોના કાર્યકારી ખર્ચમાં ઘટાડો થવાની અને રોજગારી જાળવી રાખવામાં મદદ મળવાની આશા વ્યક્ત કરવામાં આવી છે. મંત્રાલય દ્વારા લેવામાં આવેલા આ નૈતિક નિર્ણયથી ખાસ કરીને એવા ઉત્પાદન એકમોને ફાયદો થશે જેઓ લાંબા સમયથી ઈંધણના ક્વોટામાં વધારાની માંગ કરી રહ્યા હતા.