WhatsApp ઠપ્પઃ મેસેજિંગ સેવા ખોરવાતા યુઝર્સ મુંઝાયા
મેસેજ સેન્ડ કરવામાં વિલંબ અને એપ્લિકેશન વારંવાર ફ્રીઝ થતા મુશ્કેલીઃ કંપની મૌન
નવી દિલ્હી, તા.૨૭: વોટ્સએપના કરોડો યુઝર્સ હાલમાં એક વિચિત્ર ટેકનિકલ સમસ્યાનો સામનો કરી રહ્યા છે, જેમાં એપ વારંવાર હેંગ થઈ રહી છે અને મેસેજ મોકલવા કે મેળવવામાં ભારે વિલંબ થઈ રહ્યો છે. આ સમસ્યા માત્ર ભારતમાં જ નહીં, પરંતુ વૈશ્વિક સ્તરે જોવા મળી રહી છે, જેના કારણે યુઝર્સ ડિજિટલ દુનિયાથી કપાઈ ગયા હોય તેવો અનુભવ કરી રહ્યા છે. Reddit અને અન્ય સોશિયલ મીડિયા પ્લેટફોર્મ પર લોકો પોતાની વ્યથા ઠાલવી રહ્યા છે કે મેસેજ ટાઈપ કર્યા પછી એપ અચાનક થોડી સેકન્ડો માટે સ્થિર થઈ જાય છે, જે યુઝર એક્સપિરિયન્સને ખરાબ કરી રહી છે.ડાઉન ડિટેક્ટર જેવી વેબસાઇટ્સ પર હજુ સુધી કોઈ મોટા સત્તાવાર આઉટેજની પુષ્ટિ થઈ નથી, પરંતુ ઇન્ડોનેશિયાથી લઈને ભારત સુધીના વિવિધ ન્યૂઝ પોર્ટલ્સ આ સાયલન્ટ ગ્લીચ વિશે રિપોર્ટ કરી રહ્યા છે. ઘણા કિસ્સામાં એપ લોડ થવામાં સમય લે છે અથવા તો નોટિફિકેશન આવ્યા હોવા છતાં ચેટ બોક્સમાં મેસેજ દેખાતા નથી. આ ટેકનિકલ ખામી કોઈ ચોક્કસ અપડેટને કારણે છે કે સર્વરમાં આવેલી કોઈ આંતરિક સમસ્યા, તે અંગે હજુ સુધી વોટ્સએપની માલિકી ધરાવતી કંપની મેટા દ્વારા કોઈ સ્પષ્ટ ખુલાસો કરવામાં આવ્યો નથી.
(4:34 PM IST)
છેલ્લા 8 દિવસમાં સૌથી લોકપ્રિય 
