તેહરાનમાં પાકિસ્તાની દૂતાવાસ પાસે જોરદાર ધડાકોઃ કુવૈત પર ડ્રોન હુમલો
કુવૈતના શુવૈખ બંદર પર ઈરાની ડ્રોન ત્રાટકતા આંતરરાષ્ટ્રીય સ્તરે ભારે તણાવ
તેહરાન, તા.૨૭: ઈરાનની ધરતી પર વધી રહેલા યુદ્ધના સંકટ વચ્ચે ગત રાત્રે તેહરાનનો પાસદારન વિસ્તાર શક્તિશાળી વિસ્ફોટોથી ધ્રૂજી ઉઠ્યો હતો. પાકિસ્તાની દૂતાવાસ અને રાજદૂતના નિવાસસ્થાનની અત્યંત નજીક થયેલા આ વિસ્ફોટોએ સમગ્ર વિસ્તારમાં ભયનું વાતાવરણ પેદા કર્યું છે. જોકે, રાહતની વાત એ છે કે પાકિસ્તાની રાજદૂત મુદાસિર ટીપ્પુ સહિતના તમામ કર્મચારીઓ સુરક્ષિત છે. સૂત્રોના જણાવ્યા અનુસાર, આ વિસ્ફોટનું અસલી નિશાન દૂતાવાસની બાજુમાં આવેલું ઈરાની લશ્કરી મથક હોઈ શકે છે, જે આ હુમલાને વધુ ગંભીર બનાવે છે. સતત ૨૮ દિવસથી ચાલતા બોમ્બમારાના કારણે તેહરાનમાં સ્થિત વિદેશી રાજદ્વારી મિશન હવે સીધા જોખમ હેઠળ હોય તેવું જણાય છે.
બીજી તરફ, આ સંઘર્ષની જ્વાળાઓ હવે ખાડી દેશો સુધી પહોંચી ગઈ છે, જ્યાં શુક્રવારે વહેલી સવારે કુવૈતના વ્યૂહાત્મક રીતે મહત્વપૂર્ણ એવા શુવૈખ બંદર પર ડ્રોન હુમલો કરવામાં આવ્યો હતો. કુવૈત પોર્ટ ઓથોરિટીના જણાવ્યા અનુસાર, આ હુમલામાં કાર્ગોને મોટું નુકસાન થયું છે, પરંતુ સદનસીબે કોઈ જાનહાનિ થઈ નથી. આ ઘટનાને ઈરાન દ્વારા અમેરિકા અને ઈઝરાયેલના હુમલાના જવાબમાં કરવામાં આવેલી વળતી કાર્યવાહી તરીકે જોવામાં આવી રહી છે. વાણિજ્યિક કેન્દ્રો પરના આ હુમલાઓએ વૈશ્વિક વેપાર અને દરિયાઈ સુરક્ષા સામે મોટો પ્રશ્નાર્થ ચિﾎ મૂકી દીધો છે.
આ ભયાનક અસ્થિરતા વચ્ચે પાકિસ્તાન અત્યારે બેધારી તલવાર પર ચાલી રહ્યું છે. એક તરફ તેના પોતાના દૂતાવાસ પર જોખમ તોળાઈ રહ્યું છે, તો બીજી તરફ તે તુર્કી અને ઇજિપ્ત સાથે મળીને અમેરિકા અને ઈરાન વચ્ચે યુદ્ધવિરામ કરાવવા માટે સક્રિય રાજદ્વારી પ્રયાસો કરી રહ્યું છે. પાકિસ્તાને આંતરરાષ્ટ્રીય સમુદાયને અપીલ કરી છે કે રાજદ્વારી મિશનોની સુરક્ષા સુનિﾍતિ કરવામાં આવે. મધ્ય-પૂર્વમાં ફેલાયેલી આ અરાજકતા જો વહેલી તકે કાબૂમાં નહીં આવે, તો તે પ્રાદેશિક સંઘર્ષમાંથી વૈશ્વિક મહાયુદ્ધમાં પરિવર્તિત થઈ શકે તેવી ભીતિ નિષ્ણાતો સેવી રહ્યા છે.
(3:46 PM IST)
છેલ્લા 8 દિવસમાં સૌથી લોકપ્રિય 
