કાઠમંડુ:  નેપાળના રાજકીય ફલક પર એક એવી ઘટના બની છે જેની કલ્પના કદાચ મોટા ગજાના રાજકીય વિશ્લેષકોએ પણ કરી ન હતી. કાઠમંડુના લોકપ્રિય મેયર અને જાણીતા રેપર બાલેન શાહે 27 માર્ચ, 2026ના રોજ નેપાળના વડાપ્રધાન તરીકે શપથ લઈને વિશ્વને ચોંકાવી દીધું છે. તેમની જીતની સૌથી ખાસ વાત એ છે કે તેમણે પરંપરાગત નેતાઓની જેમ લાંબા અને કંટાળાજનક ભાષણો આપવાને બદલે સમગ્ર ચૂંટણી પ્રચાર દરમિયાન માત્ર 26 મિનિટ જ વાત કરી હતી. પૂર્વના ઝાપાથી લઈને પશ્ચિમના ધનગઢી સુધી માત્ર 4-5 જાહેર સભાઓ ગજવીને તેમણે જનતાના દિલ જીતી લીધા અને તેમની પાર્ટી, રાષ્ટ્રીય સ્વતંત્ર પાર્ટી (RSP) ને 52 લાખ મતો સાથે સત્તાના શિખરે પહોંચાડી દીધી.

બાલેન શાહની પ્રચાર શૈલી એટલી અનોખી હતી કે તેમણે ક્યારેય સીધી રીતે મતોની ભીખ માંગી નથી. જનકપુરમાં મૈથિલી અને પશ્ચિમ નેપાળમાં ડોટેલી ભાષાનો ઉપયોગ કરીને તેમણે સ્થાનિક લોકો સાથે ભાવનાત્મક જોડાણ સાધ્યું હતું. તેમના ભાષણોમાં કોઈની ટીકા નહોતી, માત્ર કામ કરવાની દાનત હતી. "તમે ચા પીધી?" કે "સ્થાનિક શાકભાજી ખાધા?" જેવા સામાન્ય સવાલો પૂછીને તેમણે સાબિત કરી દીધું કે રાજકારણ એ માત્ર મોટા વચનોની રમત નથી, પરંતુ સામાન્ય માણસની સંવેદનાઓને સમજવાની કળા છે. તેમણે નેપાળને સ્વિટ્ઝર્લૅન્ડ બનાવવાની ગુલબાંગો ફેંકવાને બદલે નેપાળની પ્રાકૃતિક સુંદરતાને જ વિશ્વસ્તરે લઈ જવાની વાત કરી, જે યુવા પેઢીને સ્પર્શી ગઈ.

શુક્રવારે યોજાયેલો તેમનો શપથ ગ્રહણ સમારોહ પણ તેમની વિચારધારા જેવો જ ભવ્ય અને સાંસ્કૃતિક હતો. હિન્દુ અને બૌદ્ધ પરંપરાઓના અદભૂત સંગમ સાથે, 108 વૈદિક વિદ્યાર્થીઓના મંત્રોચ્ચાર અને 16 બૌદ્ધ સાધુઓના જાપ વચ્ચે બાલેન શાહે સત્તા સંભાળી હતી. એક રેપર તરીકે જેમના ગીતોમાં સિસ્ટમ સામેનો રોષ હતો, આજે તે જ વ્યક્તિ સિસ્ટમ સુધારવા માટે વડાપ્રધાનની ખુરશી પર બેઠા છે. નેપાળના ઇતિહાસમાં આ એક એવો વળાંક છે જ્યાં અનુભવ પર જોશ અને આધુનિક વિચારસરણીનો વિજય થયો છે.