મુંબઈ: ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યા અત્યારે મેદાન પરના પોતાના પ્રદર્શનની સાથે સાથે મેદાન બહારની ઉદારતાને કારણે પણ ભારે ચર્ચામાં છે. T20 વર્લ્ડ કપ ૨૦૨૬ ની તૈયારીઓ દરમિયાન વાનખેડે સ્ટેડિયમમાં રાત-દિવસ પરસેવો પાડનાર ગ્રાઉન્ડ સ્ટાફને પંડ્યાએ એક મોટું સરપ્રાઈઝ આપ્યું છે. પોતાનું જૂનું વચન પૂરું કરતા હાર્દિકે વાનખેડેના ગ્રાઉન્ડ્સમેનને લાખો રૂપિયાનું ઇનામ આપીને સૌને ચોંકાવી દીધા છે.
વચનના પાકા નીકળ્યા 'કુંગ-ફૂ પંડ્યા'
જ્યારે હાર્દિક પંડ્યા વર્લ્ડ કપ માટે મધ્યરાત્રિ સુધી વાનખેડેના મેદાન પર પ્રેક્ટિસ કરતો હતો, ત્યારે તેને ગ્રાઉન્ડ સ્ટાફનો પૂરો સાથ મળ્યો હતો. તે સમયે તેણે સ્ટાફને વચન આપ્યું હતું કે જ્યારે તે પાછો આવશે ત્યારે તેમને યોગ્ય પુરસ્કાર આપશે. હવે IPL 2026 ની સીઝન શરૂ થાય તે પહેલા હાર્દિકે સ્ટેડિયમની મુલાકાત લીધી અને દરેક ગ્રાઉન્ડ્સમેનને વ્યક્તિગત રીતે મળીને અંદાજે ₹૧૦-૧૦ લાખ ની આર્થિક સહાય અને ભેટ સોગાદો અર્પણ કરી હતી. ગ્રાઉન્ડ સ્ટાફ સાથેનો તેનો ફોટો અત્યારે ઈન્ટરનેટ પર વાયરલ થઈ રહ્યો છે.
વર્લ્ડ કપમાં હાર્દિકનો દબદબો
ઉલ્લેખનીય છે કે હાર્દિક પંડ્યા ૨૦૨૬ ના T20 વર્લ્ડ કપ વિજેતા ટીમનો મુખ્ય હિસ્સો હતો. તેણે આખી ટુર્નામેન્ટમાં ૯ ઇનિંગ્સમાં ૨૧૭ રન બનાવ્યા અને ૯ મહત્વની વિકેટો પણ ઝડપી હતી. પાકિસ્તાન સામેની હાઈ-વોલ્ટેજ મેચમાં માત્ર ૧૬ રન આપીને ૨ વિકેટ લેવાનું તેનું પ્રદર્શન ભારતની જીતનો પાયો બન્યું હતું. બાર્બાડોસની ૨૦૨૪ ની ફાઈનલ બાદ તેણે જે વાપસીનું મન બનાવ્યું હતું, તે હવે અમદાવાદમાં ન્યુઝીલેન્ડ સામેની જીત સાથે પૂર્ણ થયું છે.