જિનેવા: મધ્ય પૂર્વમાં ચાલી રહેલું યુદ્ધ હવે માનવતાની તમામ હદો વટાવી રહ્યું હોય તેમ લાગે છે. જિનેવામાં સંયુક્ત રાષ્ટ્ર (UN) ની એક મહત્વપૂર્ણ ચર્ચાને વર્ચ્યુઅલી સંબોધિત કરતા ઈરાનના વિદેશ મંત્રી સૈયદ અબ્બાસ અરાઘચીએ અમેરિકા અને ઈઝરાયલ પર આકરા પ્રહારો કર્યા છે. ઈરાનની મીનાબ પ્રાથમિક કન્યા શાળા પર થયેલા ભીષણ હુમલામાં ૧૬૦ થી વધુ લોકોના મોત બાદ સમગ્ર વિશ્વમાં રોષ જોવા મળી રહ્યો છે.
શાળાઓ અને હોસ્પિટલો પર 'નરસંહાર'નો આરોપ
અરાઘચીએ અત્યંત ભાવુક અને આક્રમક અંદાજમાં જણાવ્યું હતું કે, છેલ્લા ૨૭ દિવસમાં ઈરાનની ધરતી પર જે થઈ રહ્યું છે તે માત્ર હુમલા નથી પણ 'નરસંહાર' છે. તેમણે દાવો કર્યો કે અત્યાધુનિક ટેકનોલોજી હોવા છતાં અમેરિકા અને ઈઝરાયલે જાણીજોઈને નાગરિક વિસ્તારોને નિશાન બનાવ્યા છે. અત્યાર સુધીમાં ૬૦૦ થી વધુ શાળાઓ, અનેક હોસ્પિટલો, રિફાઇનરીઓ અને પાણીના સ્ત્રોતો પર બોમ્બમારો કરવામાં આવ્યો છે, જેમાં ૧૦૦૦ થી વધુ વિદ્યાર્થીઓ અને શિક્ષકો ભોગ બન્યા છે.
"મૌન રહેવું એ ગુના સમાન છે"
વિશ્વ સમુદાયને ઢંઢોળતા ઈરાની વિદેશ મંત્રીએ કહ્યું કે, "અન્યાય સામે ઉદાસીનતા અને મૌન રાખવાથી શાંતિ નહીં આવે, પરંતુ તે વધુ અસુરક્ષાને આમંત્રણ આપશે." તેમણે યુએનને અપીલ કરી કે આક્રમણકારોને જવાબદાર ઠેરવવામાં આવે. તેમણે સ્પષ્ટ કર્યું કે ઈરાની રાષ્ટ્ર શાંતિપ્રિય છે અને તેમની પાસે વિશ્વની સૌથી સમૃદ્ધ સંસ્કૃતિનો વારસો છે, પરંતુ જો તેમના પર અત્યાચાર થશે તો તેઓ છેલ્લા શ્વાસ સુધી પોતાનો બચાવ કરશે.
ટ્રમ્પનું અલ્ટીમેટમ અને હુમલાની સ્થિતિ
બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે ઈરાનના ઉર્જા માળખા પરના હુમલામાં ૧૦ દિવસના વિરામની (૬ એપ્રિલ સુધી) જાહેરાત કરી હોવા છતાં, સંયુક્ત અમેરિકી-ઈઝરાયલી દળોના ઓપરેશન્સ ચાલુ છે. ઈરાન આને "મનસ્વી યુદ્ધ" ગણાવી રહ્યું છે અને વિશ્વના દેશોને આ માનવીય કટોકટીમાં દખલગીરી કરવા વિનંતી કરી રહ્યું છે.
આ હુમલાઓએ ફરી એકવાર સાબિત કર્યું છે કે યુદ્ધમાં સૌથી વધુ કિંમત નિર્દોષ બાળકો અને સામાન્ય નાગરિકોએ ચૂકવવી પડે છે. હવે જોવાનું એ રહેશે કે સંયુક્ત રાષ્ટ્ર આ મામલે કેવા પગલાં ભરે છે.