તેલઅવિવ: મધ્ય પૂર્વમાં ચાલી રહેલા ભીષણ સંઘર્ષ વચ્ચે ઇઝરાયેલી વાયુસેનાએ ઈરાનના ઔદ્યોગિક માળખાને મોટો ફટકો આપ્યો છે. આંતરરાષ્ટ્રીય મીડિયા અહેવાલો મુજબ, ઇઝરાયેલે ઈરાનની બે સૌથી મોટી સ્ટીલ ઉત્પાદક ફેક્ટરીઓને નિશાન બનાવીને હવાઈ હુમલા કર્યા છે. અહવાઝ નજીક આવેલી ખુઝેસ્તાન સ્ટીલ ફેક્ટરી અને ઈસ્ફહાન સ્થિત મુબારકેહ સ્ટીલ ફેક્ટરી પર આ બોમ્બમારો કરવામાં આવ્યો છે. આ બંને ફેક્ટરીઓ ઈરાનના અર્થતંત્રમાં ખૂબ જ મહત્વનો ભાગ ભજવે છે. હુમલાને કારણે થયેલા નુકસાનની સત્તાવાર માહિતી હજુ સુધી જાહેર કરવામાં આવી નથી.

બીજી તરફ, રાજકીય અને કૂટનીતિક મોરચે પણ મોટી હિલચાલ જોવા મળી રહી છે. અમેરિકાના ટ્રમ્પ વહીવટીતંત્ર દ્વારા રજૂ કરવામાં આવેલા ૧૫-મુદ્દાના શાંતિ કરારના માળખા અંગે ઈરાનનો સત્તાવાર પ્રતિસાદ શુક્રવારે આવવાની પ્રબળ સંભાવના વ્યક્ત કરવામાં આવી છે. સીબીએસ ન્યૂઝના અહેવાલ મુજબ, આ શાંતિ કરાર બંને દેશો વચ્ચેના તણાવને ઘટાડવામાં મહત્વની ભૂમિકા ભજવી શકે છે, જેના પર સમગ્ર વિશ્વની નજર મંડાયેલી છે.*