નવી દિલ્‍હી,તા.૨૭:  મિડલ ઈસ્‍ટમાં ચાલી રહેલા સંઘર્ષને કારણે તા.૧ એપ્રિલ ૨૦૨૬ થી ફરી એકવાર એર ટિકિટમાં વધારો થઈ શકે છે. ભારતમાં, ફેબ્રુઆરીમાં ATF ની કિમત રૂ.૯૧ પ્રતિ લિટર હતી. માર્ચમાં તે વધીને રૂ.૯૭ પ્રતિ લિટર થઈ ગઈ-જે ફક્‍ત એક જ મહિનામાં રૂ.૬ પ્રતિ લિટરનો ઉછાળો દર્શાવે છે. દિલ્‍હીથી મુંબઈની ફલાઇટમાં એક પ્‍લેન આશરે ૬,૦૦૦ લિટર ઇંધણ વાપરે છે, જેનો અર્થ એ થાય કે એક જ ફલાઇટમાં વધારાનો નાણાકીય બોજ રૂ.૩૬,૦૦૦ નો વધ્‍યો છે.

જો સરકારી તેલ કંપનીઓ એપ્રિલથી શરૂ કરીને વૈશ્વિક દરો સાથે ભાવ નક્કી કરવાનું શરૂ કરે, તો એરલાઇન્‍સના સંચાલન ખર્ચમાં ATFનો હિસ્‍સો ૮૦ ટકા સુધી વધી શકે છે. ઉડ્ડયન મંત્રી રામ મોહન નાયડુએ પોતે જણાવ્‍યું છે કે, ATFના ભાવ દર મહિનાની પહેલી તારીખે નક્કી થાય છે. આ ફેરફારની અસર ૧ એપ્રિલ ૨૦૨૬ થી સ્‍પષ્ટ થશે. આ બોજને વધુ વધારનાર હકીકત એ છે કે એરલાઇન્‍સ હાલમાં ઇરાની હવાઈ ક્ષેત્રને ટાળવા માટે લાંબા રૂટ લેવાની ફરજ પાડે છે. લાંબા રૂટના કારણે ઇંધણનો વપરાશ વધે છે અને ખર્ચમાં વધારો થાય છે. જેની સીધી અસર પ્રવાસીઓના ખિસ્‍સાને પડે એમ છે.

તા.૧૪ માર્ચથી અમલમાં મુકીને,ઈન્‍ડિગોએ તમામ સ્‍થાનિક અને આંતરરાષ્ટ્રીય ટિકિટો પર ચોક્કસ રૂટના આધારે પ્રતિ સીટ રૂ.૪૨૫ થી રૂ.૨,૩૦૦ સુધીનો ઇંધણ સરચાર્જ લાગુ કરી દીધો. એર ઇન્‍ડિયા અને એર ઈન્‍ડિયા એક્‍સપ્રેસે તા.૧૨ માર્ચથી શરૂ થતી ટિકિટો પર રૂ.૩૯૯ નો ઇંધણ સરચાર્જ લાગુ કર્યો છે. અકાસા એરે પણ ૧૫ માર્ચથી ભાવ વધારો અમલમાં મુકીને પોતાનો સરચાર્જ ઉમેર્યો.બેંગલુરુ-દિલ્‍હી રૂટ પર ભાડામાં રૂ.૧,૫૦૦ થી રૂ.૩,૦૦૦ નો વધારો થયો છે. બેંગલુરુથી આંદામાનની ટિકિટ,જે પહેલા રૂ.૧૫,૦૦૦ થી રૂ.૨૦,૦૦૦ ની વચ્‍ચે હતી એ હવે રૂ.૨૫,૦૦૦ થી રૂ.૩૦,૦૦૦ સુધી પહોંચી ગઈ છે. ગોવાનું ભાડું રૂ.૪,૦૦૦ થી વધીને રૂ.૮,૦૦૦ થી રૂ.૧૦,૦૦૦ ની વચ્‍ચે છે.

એક ટ્રાવેલ એજન્‍ટે નોંધ્‍યું હતું કે ભાડામાં માત્ર ૧૦ મિનિટમાં રૂ.૨,૦૦૦ સુધી વધી શકે છે. DGCA નું ઉનાળાનું સમયપત્રક ૨૯ માર્ચથી અમલમાં આવવાનું છે. ગયા વર્ષની તુલનામાં આ વખતે લગભગ ૨,૫૬૧ ઓછી સાપ્તાહિક ફલાઇટ્‍સ હશે. વધેલી માંગ અને મોંઘા ઇંધણની સંયુક્‍ત અસરથી હવાઈ ભાડામાં વધુ વધારો થવાની ધારણા છે