વોશિંગ્ટન તા.૨૮ઃ ઈરાન સાથે જોડાયેલા હેકર્સે FBI ડિરેકટર કાશ પટેલના અંગત ઇમેઇલ એકાઉન્ટનો ભંગ કરવાનો દાવો કર્યો છે. હેકર જૂથે પટેલના ફોટા અને ઘણા દસ્તાવેજો પણ ઇન્ટરનેટ પર જાહેર કર્યા હોવાના અહેવાલ છે.

હેકર જૂથ, હાંડાલા હેક ટીમે તેની વેબસાઇટ પર દાવો કર્યો છે કે પટેલ હવે એવા લોકોની યાદીમાં જોડાઈ ગયો છે જેમના એકાઉન્ટ સફળતાપૂર્વક હેક કરવામાં આવ્યા છે.

યુએસ ન્યાય વિભાગના એક અધિકારીએ પણ પુષ્ટિ કરી કે પટેલનું ઇમેઇલ એકાઉન્ટ હેક કરવામાં આવ્યું હતું, અને ઓનલાઈન પોસ્ટ કરવામાં આવેલ સામગ્રી પહેલી નજરે સાચો લાગે છે.

હેકર્સે પટેલના ઘણા ખાનગી ફોટા જાહેર કર્યા, જેમાં તેમને ધૂમ્રપાન અને સિગાર પીતા, જૂના કન્વર્ટિબલમાં સવારી કરતા અને રમની મોટી બોટલ સાથે અરીસામાં ફોટો લેતા રમુજી ચહેરા બનાવતા દર્શાવવામાં આવ્યા છે.

FBI એ પુષ્ટિ આપી કે પટેલના ઇમેઇલ્સ હેક કરવામાં આવ્યા હતા. એક નિવેદનમાં, બ્યુરોના પ્રવકતા બેન વિલિયમસને કહ્યું, અમે આ પ્રવૃત્તિ સાથે સંકળાયેલા સંભવિત જોખમોને ઘટાડવા માટે તમામ જરૃરી પગલાં લીધાં છે, અને ઉમેર્યું કે સામેલ ડેટા ઐતિહાસિક પ્રકૃતિનો છે અને તેમાં કોઈ સરકારી માહિતી શામેલ નથી.

હંડાલા પોતાને પેલેસ્ટિનિયન તરફી વિજિલન્ટ હેકર્સના જૂથ તરીકે વર્ણવે છે, પરંતુ પશ્ચિમી સાયબર નિષ્ણાતો માને છે કે આ જૂથ ઈરાનના સરકારી સાયબર ગુપ્તચર એકમો સાથે જોડાયેલ હોઈ શકે છે.

એવું માનવામાં આવે છે કે તે બહુવિધ નકલી ઓળખનો ઉપયોગ કરીને સાયબર હુમલા કરે છે. આ જૂથે અગાઉ ૧૧ માર્ચે મિશિગન સ્થિત તબીબી સાધનો કંપની સ્ટ્રાઇકર પર સાયબર હુમલો કરવાનો દાવો કર્યો હતો અને કહ્યું હતું કે તેણે કંપનીનો મોટો ડેટા નાશ કર્યો છે