નવી દિલ્હી :મધ્ય પૂર્વમાં ઈરાન, અમેરિકા અને ઈઝરાયેલ વચ્ચે ચાલી રહેલા યુદ્ધના ભયાનક તણાવ વચ્ચે ભારત માટે એક મોટા સમાચાર આવ્યા છે. વૈશ્વિક ઓઈલ પુરવઠા માટે અત્યંત સંવેદનશીલ ગણાતા 'સ્ટ્રેટ ઓફ હોર્મુઝ' ના માર્ગ પરથી પેટ્રોલિયમ ઉત્પાદનો લઈને આવતા ભારતના વધુ 2 વેપારી જહાજો સુરક્ષિત રીતે પસાર થઈ રહ્યા છે.

આ જહાજોની સુરક્ષા સુનિશ્ચિત કરવા માટે ભારતીય નૌસેના સંપૂર્ણ રીતે મુસ્તૈદ છે. ફારસની ખાડીમાં નૌસેનાના યુદ્ધપોતો તૈનાત કરવામાં આવ્યા છે, જે આ જહાજોને સુરક્ષિત રસ્તો પૂરો પાડી રહ્યા છે. તાજેતરમાં જ 42,000 મેટ્રિક ટન એલપીજી લઈને 'જગ વસંત' નામનું જહાજ ગુજરાતના કંડલા બંદરે સફળતાપૂર્વક પહોંચ્યું છે. વિદેશ મંત્રાલયના જણાવ્યા અનુસાર, અત્યાર સુધીમાં એલપીજીથી ભરેલા કુલ 4 ભારતીય જહાજો આ જોખમી માર્ગને સુરક્ષિત રીતે પાર કરી ચૂક્યા છે. જોકે, ઈરાને તાજેતરમાં પોતાના દુશ્મન દેશો સાથે જોડાયેલા 3 જહાજોને આ માર્ગ પરથી પાછા મોકલી દીધા હતા, પરંતુ ભારત સહિત 26 જહાજોને પસાર થવાની મંજૂરી આપી છે.

કેન્દ્રીય જહાજ મંત્રાલયના જણાવ્યા મુજબ, હાલમાં અખાતી વિસ્તારમાં ભારતીય ધ્વજ ધરાવતા લગભગ 20 જહાજો કાર્યરત છે, જેમાં અંદાજે 540 ભારતીય નાવિકો સવાર છે અને આ તમામ સુરક્ષિત છે. શિપિંગ ડાયરેક્ટોરેટ જનરલનું કોમ્યુનિકેશન સેન્ટર 24x7 કાર્યરત છે. છેલ્લા 24 કલાકમાં આ સેન્ટર દ્વારા 98 કોલ અને 335 ઈમેલના ત્વરિત જવાબો આપીને નાવિકો અને જહાજ માલિકોની ચિંતા દૂર કરવામાં આવી છે. સરકાર આંતરરાષ્ટ્રીય ભાગીદારો સાથે સતત સંપર્કમાં છે જેથી આ દરિયાઈ માર્ગ પર ભારતની અવરજવર બેરોકટોક ચાલુ રહે.

ભારત સરકારે સ્પષ્ટ કર્યું છે કે દેશમાં પેટ્રોલ, ડીઝલ કે રાંધણ ગેસની કોઈ અછત નથી અને પુરવઠો સંપૂર્ણ રીતે નિયંત્રણમાં છે. ભારત પાસે હાલમાં 60 દિવસનો વાસ્તવિક સ્ટોક કવર ઉપલબ્ધ છે અને દેશની કુલ રિઝર્વ ક્ષમતા 74 દિવસની છે. પેટ્રોલિયમ મંત્રાલયના જણાવ્યા અનુસાર, આગામી 60 દિવસ માટે કાચા ઓઈલની ખરીદી અગાઉથી જ સુનિશ્ચિત કરી લેવામાં આવી છે. ભારત પોતાના 41 થી વધુ વૈશ્વિક સપ્લાયર્સ પાસેથી સતત ઓઈલ મેળવી રહ્યું છે, તેથી સોશિયલ મીડિયા પર ફેલાતી અછતની અફવાઓથી ગભરાવાની જરૂર નથી.