મનામા:  મધ્ય પૂર્વમાં ચાલી રહેલા ભીષણ યુદ્ધની સૌથી ભયાનક અસર હવે ઈરાન સરહદની બહાર બહેરીનમાં જોવા મળી રહી છે. ભૌગોલિક રીતે નાનો પણ વ્યુહાત્મક રીતે અત્યંત મહત્વનો ગણાતો આ દેશ અત્યારે જ્વાળામુખીના ઢગલા પર બેઠો છે. ૨૮ ફેબ્રુઆરીથી શરૂ થયેલા સંઘર્ષ બાદ બહેરીન સરકારે ૨૦૦થી વધુ શિયા મુસ્લિમોની રાજદ્રોહ અને જાસૂસીના આરોપસર ધરપકડ કરી છે. શિયા સમુદાયના કાર્યકર મોહમ્મદ અલ્મોસાવીનું પોલીસ કસ્ટડીમાં શંકાસ્પદ મોત થતા આક્રોશની જ્વાળા વધુ ભભૂકી ઉઠી છે, જેના કારણે મનામાની ગલીઓમાં હવે લોકશાહી અને શાસન પરિવર્તનના નારા ગુંજી રહ્યા છે.

બહેરીનનું સામાજિક માળખું હંમેશાથી એક 'ટાઈમ બોમ્બ' જેવું રહ્યું છે, જ્યાં ૬૦% વસ્તી શિયા હોવા છતાં સત્તાની લગામ લઘુમતી સુન્ની શાસકોના હાથમાં છે. વર્તમાન યુદ્ધે આ જૂના જખમોને ફરી તાજા કરી દીધા છે. એકતરફ બહેરીન સરકારના ઇઝરાયલ સાથેના સામાન્ય સંબંધો અને દેશમાં આવેલું અમેરિકી 'ફિફ્થ ફ્લીટ'નું મુખ્ય મથક છે, તો બીજી તરફ સ્થાનિક જનતાની ઈરાન પ્રત્યેની સહાનુભૂતિ છે. ઈરાન દ્વારા અમેરિકી બેઝ પર કરવામાં આવેલા હુમલાઓને સ્થાનિક શિયા સમુદાય સમર્થન આપી રહ્યો છે, જે શાસક પરિવાર માટે અસ્તિત્વનું સંકટ બની ગયું છે.

માનવાધિકાર સંગઠનોના મતે બહેરીનમાં હાલમાં "ભય અને આતંકનું શાસન" પ્રવર્તી રહ્યું છે, જ્યાં સોશિયલ મીડિયા પોસ્ટના આધારે પણ લોકોની અટકાયત કરવામાં આવે છે. નિષ્ણાતો ચેતવણી આપી રહ્યા છે કે જો ઈરાન-અમેરિકા સંઘર્ષ લાંબો ચાલશે, તો બહેરીનમાં ૨૦૧૧ જેવી જ જનક્રાંતિ (આરબ સ્પ્રિંગ) ફરી જોવા મળી શકે છે. આ વખતે પરિસ્થિતિ વધુ વણસી શકે છે કારણ કે પ્રાદેશિક શક્તિઓ આ આંતરિક અસંતોષનો ઉપયોગ પોતપોતાના હિત સાધવા માટે કરી શકે છે. બહેરીન માટે આગામી કેટલાક મહિનાઓ સત્તા ટકાવી રાખવા માટે અત્યંત પડકારજનક સાબિત થશે.