નોઇડા:  વડાપ્રધાન નરેન્દ્ર મોદીએ દેશના સૌથી મોટા ગ્રીનફિલ્ડ એરપોર્ટ 'નોઇડા ઇન્ટરનેશનલ એરપોર્ટ'નું ભવ્ય ઉદ્ઘાટન કર્યું, પરંતુ આ વિકાસના અસલી હીરો આસપાસના ગામડાઓના ખેડૂતો સાબિત થયા છે. કિશોરપુર અને તેની આસપાસના વિસ્તારોમાં જમીન સંપાદનને કારણે ખેડૂતોના ખાતામાં કરોડો રૂપિયા જમા થયા છે. સોશિયલ મીડિયા પર અત્યારે એક એવા ખેડૂતની ચર્ચા જોરશોરથી ચાલી રહી છે, જેને ₹15 કરોડનું વળતર મળતા તેણે સીધું હેલિકોપ્ટર જ ખરીદી લીધું છે! આ ખેડૂત હવે ખેતરોમાં હળ ચલાવવાને બદલે આકાશમાં ઉડવાના સપના જોઈ રહ્યો છે અને ટૂંક સમયમાં જ પોતાના મિત્રો સાથે થાઈલેન્ડના વેકેશન પર જવાનું આયોજન કરી રહ્યો છે.

માત્ર મોટા ખેડૂતો જ નહીં, પણ નાના કામદારોના જીવનમાં પણ આ એરપોર્ટ પ્રોજેક્ટ આશીર્વાદ સમાન સાબિત થયો છે. અજય બેનીવાલ જેવી વ્યક્તિઓ, જેઓ એક સમયે આર્થિક તંગીનો સામનો કરી રહ્યા હતા, તેઓ આજે એરપોર્ટ સાઇટ પર મજૂરો માટે સુરક્ષા સેવાઓ પૂરી પાડીને દર મહિને ₹60,000 થી વધુની કમાણી કરી રહ્યા છે. જેવર એરપોર્ટની આસપાસની જમીનોના ભાવમાં થયેલો ૫૩૬% સુધીનો તોતિંગ વધારો એ બાબતની સાક્ષી પૂરે છે કે આ વિસ્તાર હવે રિયલ એસ્ટેટનું ગોલ્ડન હબ બની ગયો છે. રહેણાંક અને વાણિજ્યિક મિલકતો માટેની પૂછપરછમાં થયેલો ઉછાળો સ્થાનિક અર્થતંત્રને નવી ઊંચાઈઓ પર લઈ જઈ રહ્યો છે.

જાહેર-ખાનગી ભાગીદારી ( મોડલ હેઠળ બનેલું આ એરપોર્ટ વાર્ષિક ૧૨ મિલિયન મુસાફરોની ક્ષમતા સાથે શરૂ થયું છે, જે ભવિષ્યમાં ૭૦ મિલિયન સુધી પહોંચશે. આનાથી દિલ્હીના આઈજીઆઈ (IGI) એરપોર્ટ પરનો ભાર તો ઘટશે જ, પણ સાથે સાથે પશ્ચિમ ઉત્તર પ્રદેશમાં રોજગારી અને પ્રવાસનની નવી તકો ઉભી થશે. જમીનના બદલામાં મળેલા વળતરે ખેડૂતોની જીવનશૈલીને વૈભવી બનાવી દીધી છે, જે હવે પરંપરાગત ખેતી છોડીને આધુનિક બિઝનેસ અને લક્ઝરી લાઈફ તરફ વળી રહ્યા છે. આ પરિવર્તન દર્શાવે છે કે કેવી રીતે એક મોટો ઈન્ફ્રાસ્ટ્રક્ચર પ્રોજેક્ટ સામાન્ય લોકોના નસીબના દરવાજા ખોલી શકે છે.