પટના: તા.૨૮: દેશની પ્રીમિયમ ટ્રેન ગણાતી વંદે ભારત એક્સપ્રેસમાં ભોજનની ગુણવત્તાને લઈને ફરી એકવાર ગંભીર સવાલ ઉભો થયો છે. પટના-ટાટાનગર વંદે ભારત એક્સપ્રેસમાં એક મુસાફરને પીરસવામાં આવેલા દહીંમાંથી જીવડાં નીકળતા ખળભળાટ મચી ગયો છે. આ ઘટનાની ગંભીરતાને જોતા ઈન્ડિયન રેલવે કેટરિંગ એન્ડ ટુરિઝમ કોર્પોરેશન (IRCTC) એ અત્યાર સુધીની સૌથી કડક કાર્યવાહી હાથ ધરી છે.
રેલવે તંત્રએ માત્ર ફરિયાદની નોંધ જ નથી લીધી, પરંતુ દહીં સપ્લાય કરનાર જાણીતી ડેરી બ્રાન્ડ 'અમૂલ' (Amul) ને પણ કારણદર્શક નોટિસ ફટકારી ખુલાસો માંગ્યો છે. મુસાફરની સુવિધા અને સ્વાસ્થ્ય સાથે ચેડાં કરનારા કેટરિંગ કોન્ટ્રાક્ટર સામે પણ આકરા પગલાં લેવામાં આવ્યા છે.
 
રેલવેનો 'ડબલ એટેક': દંડ અને બ્લેકલિસ્ટની કાર્યવાહી
•    કેટરિંગ કંપની પર દંડ: જે કંપની ટ્રેનમાં ભોજન પૂરું પાડતી હતી તેના પર ₹50 લાખનો તોતિંગ દંડ ફટકારવામાં આવ્યો છે.
•    IRCTC પર દંડ: બેદરકારી બદલ ભારતીય રેલવેએ પોતે IRCTC પર પણ ₹10 લાખનો દંડ લાદ્યો છે.
•    કરાર રદ: સંબંધિત કોન્ટ્રાક્ટરનો લાયસન્સ તાત્કાલિક અસરથી રદ કરવાની પ્રક્રિયા શરૂ કરી દેવામાં આવી છે અને તેને ભવિષ્ય માટે બ્લેકલિસ્ટ કરવામાં આવશે.
 
આ ઘટનાએ વંદે ભારત જેવી હાઈ-ટેક ટ્રેનોમાં કેટરિંગ સેવાઓની પોલ ખોલી દીધી છે. રેલવે અધિકારીઓએ સ્પષ્ટ કર્યું છે કે મુસાફરોને શુદ્ધ અને સાત્વિક આહાર પૂરો પાડવો એ અમારી સર્વોચ્ચ પ્રાથમિકતા છે. ભવિષ્યમાં આવી ઘટનાઓ ન બને તે માટે હવે પેકેજિંગ અને ફૂડ સોર્સિંગના નિયમો વધુ કડક બનાવવામાં આવશે.
મુસાફરોમાં આ ઘટનાને લઈને રોષ જોવા મળી રહ્યો છે, ત્યારે રેલવેએ ખાતરી આપી છે કે ઓનબોર્ડ સર્વિસ પ્રોવાઈડર્સ પર સતત દેખરેખ રાખવા માટે સ્પેશિયલ ટીમો તૈનાત કરવામાં આવશે.