અમદાવાદ: ભારતીય રેલવેએ મુસાફરોની મુસાફરીને વધુ સુખદ અને પારિવારિક બનાવવા માટે એક ક્રાંતિકારી નિર્ણય લીધો છે. હવેથી રેલવે સ્ટેશનો, પ્લેટફોર્મ અને ટ્રેનના ડબ્બાઓમાં જોવા મળતી વાંધાજનક જાહેરાતો ભૂતકાળ બની જશે. રેલવે બોર્ડે સ્પષ્ટ સૂચના આપી છે કે દારૂ, સિગારેટ, બીડી અને કોઈપણ પ્રકારના તમાકુ ઉત્પાદનોના પ્રમોશન પર સંપૂર્ણ પ્રતિબંધ રહેશે. એટલું જ નહીં, મહિલાઓની ગરિમાને ઠેસ પહોંચાડે તેવા અશ્લીલ દ્રશ્યો કે દ્વિઅર્થી સંવાદો ધરાવતી જાહેરાતો સામે પણ લાલ આંખ કરવામાં આવી છે. આ નિર્ણયનો મુખ્ય હેતુ રેલવે પરિસરને સ્વચ્છ અને નૈતિક રીતે સુરક્ષિત રાખવાનો છે.

રેલવેની 'નોન-ફેર રેવન્યુ' પોલિસી હેઠળ જાહેરાતો દ્વારા કરોડોની કમાણી થાય છે, પરંતુ હવે કમાણી કરતા 'મર્યાદા'ને વધુ મહત્વ આપવામાં આવશે. નવી માર્ગદર્શિકા મુજબ, ખાનગી વીમા કંપનીઓ જે રેલવે અકસ્માતોને આધારે પોતાની પોલિસી વેચે છે અથવા પરિવહનના અન્ય સ્પર્ધક માધ્યમો (જેમ કે ખાનગી બસ સેવા) ની જાહેરાતો પર પણ લગામ લગાવી દેવામાં આવી છે. કોઈપણ એજન્સીએ જાહેરાત પ્રદર્શિત કરતા પહેલા સંબંધિત રેલવે વિભાગ પાસેથી લેખિત મંજૂરી લેવી પડશે અને તમામ કેન્દ્રીય તથા રાજ્ય કાયદાઓનું પાલન કરવું ફરજિયાત રહેશે.

આ સમગ્ર પ્રક્રિયાને પારદર્શક બનાવવા માટે રેલવેએ 'ઇ-પ્રોક્યોરમેન્ટ સિસ્ટમ' પોર્ટલ દ્વારા ઇ-ઓક્શન શરૂ કર્યું છે. જો કોઈ એજન્સી નિયમોનું ઉલ્લંઘન કરી છૂપી રીતે પ્રતિબંધિત વસ્તુઓનું બ્રાન્ડિંગ કરશે, તો તેમનો કોન્ટ્રાક્ટ તાત્કાલિક રદ કરી ભારે દંડ ફટકારવામાં આવશે. આ ઐતિહાસિક સુધારાથી ખાસ કરીને મહિલા અને બાળ મુસાફરોમાં સુરક્ષા અને સન્માનની ભાવના વધશે. હવે જ્યારે તમે પ્લેટફોર્મ પર ઉતરશો, ત્યારે તમને ભડકાઉ પોસ્ટરોને બદલે સામાજિક સંદેશા અથવા સરકારની લોકકલ્યાણકારી યોજનાઓની જ જાહેરાતો જોવા મળશે.