નવી દિલ્હી: સોશિયલ મીડિયાની દુનિયામાં ક્યારે કયો સંવાદ 'વાયરલ' થઈ જાય તે કહેવું મુશ્કેલ છે, પરંતુ હાલમાં ફિલ્મ 'ધુરંધર' ના એક ડાયલોગે આખા દેશમાં ધૂમ મચાવી છે. દિગ્ગજ અભિનેતા રાકેશ બેદી દ્વારા ભજવવામાં આવેલ 'જમીલ જમાલી' ના પાત્રનો સંવાદ "મેરા બચ્ચા હૈ તુ" અત્યારે દરેકના સ્માર્ટફોન અને રીલ્સમાં ગુંજી રહ્યો છે. આ પાત્રની સરળ અને રમૂજી શૈલી એટલી લોકપ્રિય થઈ છે કે હવે સરકારી વિભાગો પણ લોકો સુધી પોતાની વાત પહોંચાડવા માટે આ 'ધુરંધર' પાત્રનો સહારો લઈ રહ્યા છે.

દિલ્હી પોલીસની 'સમજદારી' વાળી સલાહ

ટ્રાફિક નિયમો પ્રત્યે લોકોને જાગૃત કરવા માટે દિલ્હી પોલીસે આ ટ્રેન્ડનો ખૂબ જ સર્જનાત્મક ઉપયોગ કર્યો છે. તેમણે સોશિયલ મીડિયા પ્લેટફોર્મ 'X' પર હેલ્મેટ પહેરવાની અપીલ કરતા લખ્યું, "હેલ્મેટ પહેરી લો, તમે મારા બાળક (મેરા બચ્ચા) છો. જો હેલ્મેટ પહેરશો તો જ તમે સમજદાર બનશો." પોલીસની આ રમુજી શૈલીને લોકો ખૂબ પસંદ કરી રહ્યા છે.

પર્યટન અને આતિથ્યમાં પણ જમીલ જમાલીનો જાદુ

રાજસ્થાન પ્રવાસન વિભાગે આ ડાયલોગનો ઉપયોગ કરીને પ્રવાસીઓને આવકાર્યા છે. તેમણે રાજસ્થાની થાળીનો ફોટો શેર કરતા સંદેશ આપ્યો કે, "તમે અમારા મહેમાન છો... અને આતિથ્ય એ જ અમારી ઓળખ છે." બીજી તરફ, ઉત્તર પ્રદેશ પ્રવાસન વિભાગે પોતાની એપનો પ્રચાર કરતા લખ્યું, "જો તમે હજુ પણ મૂંઝવણમાં હોવ કે યુપીની યાત્રા ક્યાંથી શરૂ કરવી, તો ચિંતા ના કરો, તમે બાળક છો... બસ એપ ડાઉનલોડ કરો અને બધી માહિતી મેળવો."

ખાદ્ય સુરક્ષા માટે FSSAI ની અપીલ

માત્ર પોલીસ કે પર્યટન જ નહીં, પરંતુ ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ પણ ભેળસેળિયા ખોરાક સામે જંગ છેડવા આ ટ્રેન્ડ અપનાવ્યો છે. તેમણે લખ્યું, "તમે મારા બાળક છો, અસલી અને નકલી ખોરાક વચ્ચેનો તફાવત ઓળખતા શીખો." આમ, રાકેશ બેદીનું આ પાત્ર માત્ર મનોરંજન પૂરતું મર્યાદિત ન રહેતા એક સામાજિક સંદેશાવાહક બની ગયું છે.

રાકેશ બેદીની ઉત્તમ કોમિક ટાઈમિંગ અને સરળ અભિનયે આ પાત્રને જીવંત કરી દીધું છે, જેને કારણે તે દરેક ઉંમરના લોકોમાં લોકપ્રિય બન્યું છે.