નવી દિલ્હી: આગામી ૧ એપ્રિલ ૨૦૨૬થી દેશમાં નવા નાણાકીય વર્ષનો પ્રારંભ થઈ રહ્યો છે. આ સાથે જ કેન્દ્ર સરકાર અને બેંકો દ્વારા અનેક નિયમોમાં મોટા ફેરફારો કરવામાં આવ્યા છે, જેની સીધી અસર સામાન્ય માણસના બજેટ અને રોજિંદા વ્યવહારો પર પડશે. આવકવેરાના નવા કાયદાથી લઈને ગેસના ભાવ અને એટીએમ ઉપાડ સુધીના આ ૧૦ ફેરફારો તમારા માટે જાણવા ખૂબ જ જરૂરી છે.
 
આવકવેરામાં ઐતિહાસિક ફેરફાર: ૧૯૬૧નો કાયદો વિદાય લેશે
ભારતીય કર પ્રણાલીમાં ૧ એપ્રિલથી મોટો વળાંક આવી રહ્યો છે. ૧૯૬૧ના જૂના આવકવેરા કાયદાના સ્થાને હવે આવકવેરા કાયદો ૨૦૨૫ અમલમાં આવશે.
•    ₹૧૨ લાખ સુધી કોઈ ટેક્સ નહીં: નવા ટેક્સ શાસન (New Tax Regime) હેઠળ કલમ 87A ની મર્યાદા વધારવામાં આવી છે, જેના કારણે હવે વાર્ષિક ₹૧૨ લાખ સુધીની આવક ધરાવનારાઓએ એક પણ રૂપિયો ટેક્સ ચૂકવવો પડશે નહીં.
•    TDS ફોર્મ બદલાશે: ફોર્મ ૧૬ અને ૧૬-એ ને બદલે હવે ફોર્મ ૧૩૦ અને ૧૩૧ નો ઉપયોગ થશે, જે ટેક્સ ભરવાની પ્રક્રિયાને વધુ સરળ બનાવશે.
 
બેંકિંગ અને ATM: હવે ખિસ્સા વધુ ખાલી થશે
જો તમે વારંવાર ATM માંથી પૈસા ઉપાડો છો, તો આ ફેરફારો ખાસ વાંચજો:
1.    HDFC બેંક: ૧ એપ્રિલથી ફ્રી લિમિટમાં UPI દ્વારા થતા ATM ઉપાડનો પણ સમાવેશ થશે. ૫ ટ્રાન્ઝેક્શન બાદ દરેક ઉપાડ પર ₹૨૩ નો ચાર્જ લાગશે.
2.    બંધન બેંક: મેટ્રો શહેરોમાં માત્ર ૩ અને અન્ય શહેરોમાં ૫ ફ્રી ટ્રાન્ઝેક્શન મળશે. મર્યાદા પૂરી થયા બાદ ₹૨૩ ચાર્જ અને જો બેલેન્સ ન હોવાને કારણે ટ્રાન્ઝેક્શન નિષ્ફળ જાય તો ₹૨૫ નો દંડ થશે.
3.    PNB કાર્ડ લિમિટ: પંજાબ નેશનલ બેંકે ડેબિટ કાર્ડની દૈનિક ઉપાડ મર્યાદામાં ફેરફાર કરીને તેને ₹૭૫,૦૦૦ સુધી મર્યાદિત કરી છે.
 
રેલવે મુસાફરો માટે માઠા સમાચાર: રિફંડના નિયમો કડક
રેલવેએ ટિકિટ કેન્સલેશન અને રિફંડના નિયમોમાં મોટો ફેરફાર કર્યો છે.
•    ૮ કલાકનો નિયમ: હવે ટ્રેન ઉપડવાના ૮ કલાકની અંદર ટિકિટ કેન્સલ કરાવશો તો એક પણ રૂપિયો રિફંડ મળશે નહીં. અગાઉ આ મર્યાદા ૪ કલાકની હતી.
•    સ્લેબ મુજબ કપાત: જો ટિકિટ ૮ થી ૨૪ કલાક પહેલા કેન્સલ કરાવો તો ૫૦% અને ૨૪ થી ૭૨ કલાક પહેલા કરાવો તો ૨૫% રકમ કાપી લેવામાં આવશે.
 
PAN કાર્ડ અને ગેસ સિલિન્ડરના નવા અપડેટ્સ
•    PAN કાર્ડ: હવે PAN કાર્ડ કઢાવવા માટે જન્મ તારીખના પુરાવા તરીકે આધાર કાર્ડ ચાલશે નહીં. તમારે ફરજિયાતપણે ૧૦માની માર્કશીટ અથવા પાસપોર્ટ આપવો પડશે.
•    ગેસ અને ઇંધણ: દર મહિનાની જેમ ૧લી એપ્રિલે ઘરેલુ LPG સિલિન્ડર, CNG અને PNG ના ભાવમાં સુધારો થઈ શકે છે, જેની અસર રસોડાના બજેટ અને પરિવહન ખર્ચ પર પડશે.
આ નવા ફેરફારો તમારા નાણાકીય આયોજનને ખોરવી શકે છે, તેથી સમયસર તૈયારી કરી લેવી હિતાવહ છે.