તહેરાન: ઈરાન અને અમેરિકા વચ્ચેનો તણાવ હવે સીધા અને વિનાશક યુદ્ધમાં ફેરવાઈ ગયો છે. સાઉદી અરેબિયામાં આવેલા પ્રિન્સ સુલતાન એરબેઝ પર ઈરાને કરેલા સીધા મિસાઈલ હુમલામાં અમેરિકી વાયુસેનાનું અત્યાધુનિક ઈ૩જી સેન્ટ્રી અવાક્સ જેટ સંપૂર્ણપણે નાશ પામ્યું છે. આ હુમલાએ અમેરિકન સંરક્ષણ પ્રણાલીની મજબૂતી પર ગંભીર સવાલો ઉભા કર્યા છે. આ વિમાન ઓક્લાહોમાના ટિંકર એરફોર્સ બેઝનું હતું અને તેના ટેલ નંબર અને કોડ ૮૧-૦૦૦૫ એઈ૧૧ઈઈ તરીકે સત્તાવાર રીતે ઓળખવામાં આવ્યા છે.

ડિજિટલ મીડિયા પ્લેટફોર્મ એક્સ અને આંતરરાષ્ટ્રીય અહેવાલો અનુસાર, ઈઝરાયેલ સાથે ચાલી રહેલા આ ભીષણ યુદ્ધમાં અત્યાર સુધીમાં કુલ સાત અમેરિકન ફાઈટર જેટ તોડી પાડવામાં આવ્યા છે, જે અમેરિકા માટે સંરક્ષણ ક્ષેત્રે બહુ મોટો ફટકો સાબિત થયો છે. 

આ ગંભીર પરિસ્થિતિને જોતા અમેરિકાના રાષ્ટ્રપતિ ડોનાલ્ડ ટ્રમ્પ વધુ આક્રમક વલણ અપનાવી રહ્યા છે. પ્રાપ્ત સત્તાવાર વિગતો મુજબ, ડોનાલ્ડ ટ્રમ્પ હવે માત્ર હવાઈ હુમલાઓ પૂરતા સીમિત રહેવા માંગતા નથી. તેઓ ઈરાન વિરુદ્ધ આગામી કેટલાક અઠવાડિયાઓ સુધી ચાલનારા જમીની લશ્કરી ઓપરેશન અથવા ગ્રાઉન્ડ ઓપરેશનની સઘન અને વ્યાપક તૈયારીઓ યુદ્ધના ધોરણે કરી રહ્યા છે.

આ નિર્ણાયક મિસાઈલ હુમલા બાદ મધ્ય પૂર્વમાં યુદ્ધનું સ્વરૂપ વધુ ભયાવહ બની ગયું છે. અમેરિકન સેનાને હાઈ એલર્ટ પર મૂકવામાં આવી છે અને ઈરાનના લશ્કરી તેમજ રડાર ઠેકાણાઓ પર સખત વળતો પ્રહાર કરવાની વ્યૂહાત્મક યોજનાઓ ઘડાઈ રહી છે. આ ઘટનાક્રમ સ્પષ્ટપણે દર્શાવે છે કે ભવિષ્યમાં તણાવ વધશે અને યુદ્ધ વધુ લાંબુ ચાલશે.